46
2e. Jacob e-machimalabo Egipto-yarse-nonikid
(46:1–50:26)
Jacob Egipto-yarse megnaded
1 Israel Egipto-yarse nadegusad, bela ibmar-nikad sesa gusad. Israelʼde Jacobʼye nugbalid. Beerseba-neggweburse mosgu, e-bab-Isaac-e-Bab-Dummadga ibmar-ogumakar uksad. We-Bab-Dummadde e-bab-Isaac-e-Bab-Dummadmogad.
2 A-mutikidba Bab-Dummad Israelʼga gabdakedba sunmaksad. Jacobʼse e-nugba gornonikid:
—¡Jacob!
Jacob Bab-Dummad-abin sogded:
—Wegi an be-itomai.
3 Geb degi, Bab-Dummad sogded:
—Ani, an Bab-Dummadid, be-bab-e-Bab-Dummadmogad. Egipto-yarse-be-naed mer dobguo, ar ade, agi be-wagan bukidar-merguega an imakoed. 4 Ani, an beba Egiptoʼse naoed, degi, an-sunnad gannar we-yarse-dagega an be-imakoed. Deginbali, be burgwiar-sogele, José be-dikarba-gwichi guoed.
5 Geb a-sorbali, Jacob, Beersebaʼgi-maid naded. Israel-machimala, Faraón-urmar-napagined-ibmar-seed-barmialidgi, e-bab, e-bab-e-omegan, degi, e-mimmigan-onakwis sesmalad. 6 Jacob, degi, e-gwenadgan, bela Egipto-yarse nadmalad. We-ibmar sesmalad:
E-molimar-bebe-nikad,
e-sibad-wawaadmar,
degi, bela Canaán-yargi ibmar-nikad sesad.
7 Bela wemar Jacobʼba Egipto-yarse nade gusmalad:
E-masmala,
e-sisgan,
degi, e-wagan.
8 Jacobʼde Israelʼye nugbalid. Israel-masmala Egipto-yarse-nadegusmalad-e-nugmar, wemalad:
Rubén, Jacob-machi-gebesailagined.
9 Rubén-e-masmaladi, wemalad:
Hanoc, Falú, Hezrón, Carmi.
10 Simeón, Rubén-yarbalidid.
E-masmaladi, wemarmogad:
Jemuel, Jamín, Ohad,
Jaquín, Zohar, Saúl.
Saúl-e-nande Canaán-dolad.
11 Leví, Simeón-yarbalidid.
E-masmaladi, wemarmogad:
Gersón, Coat, Merari.
12 Judá, Leví-yarbalidid.
E-masmaladi, wemarmogad:
Er, Onán, Sela,
Fares, Zara.
Ar Erʼdi, Onán-ebogwa Canaán-yargi burgwismalad.
Fares-e-masmaladi, wemarmogad:
Hezrón, Hamul.
13 Isacar, Leví-yarbalidid.
E-masmaladi, wemarmogad:
Tola, Fúa, Job, Simrón.
14 Zabulón, Isacar-yarbalidid.
E-masmaladi, wemarmogad:
Sered, Elón, Jahleel.
15 Jacob, we-masmala Padan-Aram-neggweburgi Leaʼbo baksa gusad.
Agi, e-bunagwa-Dina baksabalid.
Bela-e-wagan: Omegan, degi, macherganse-bakar, dulagwen-gakambe-gakapaa-mergu (33) gusad.
16 Jacob masmala-Zilpaʼbo-baksad, wemalad:
Gwensak, Gadʼye nugad.
E-masmaladi, wemalad:
Zifión, Hagui, Ezbón, Suni,
Eri, Arodi, Areli.
17 Baiddi, Aserʼye nugad.
E-masmaladi, wemarmogad:
Imna, Isúa, Isúi, Bería.
Degine, amar-e-bundi Seraʼye nugad.
Bería-e-masmaladi, wemarmogad:
Heber, Malquiel.
18 We-masmala-ebogwad, Zilpa Jacobʼbo baksad. Zilpaʼde Labán-e-mai guenad. Labán na e-sisgwa-Leaʼga Zilpa-uksa gusad.
Bela Zilpa-masmala e-mimmiganse-bakale, warambe-gakanergwa-mergu (16) gusad.
19 Raquel Jacobʼbo-baksaddi, wemalad:
José, Benjamín.
20 José Egipto-yargi Asenatʼbo-masmala-baksadi, wemalad:
Manasés, Efraín.
Asenatʼde, Potifera-e-sisgwad.
Potiferaʼde, On-neggweburgi dule-irwa-e-bab-dummadse-goledid.
21 Benjamín-e-masmaladi, wemarmogad:
Bela, Bequer, Asbel,
Gera, Naamán, Ehi, Ros,
Mupim, Hupim, degi, Ard.
22 Wemala, Raquel, degi, Jacob-wagan-gumalad.
Bela warambe-gakabake-mergu (14) gusad.
23 Jacob masmala-Bilhaʼbo-baksad, wemalad:
Gwensak, Danʼye nugad.
E-machidi, wedid:
Husim.
24 Baiddi, Neftalíʼye nugad.
E-masmaladi, wemalad:
Jahzeel, Guni,
Jezer, degi, Silem.
25 We-masmala-ebogwad, Bilha Jacobʼbo baksad. Bilhaʼde Labán-e-mai guenad. Labán e-sisgwa-Raquelʼga Bilha-uksa gusad. Bela Bilha-masmala e-mimmiganse-bakale, walagugle-mergu (7) gumalad.
26 Dulemar-ablis-galagwenmalad Jacobʼba Egipto-yarse nonimaladi, bela dulapaa-gakanergwa (66) mergued. E-masmala-e-omegandi gwen obarilesulid. 27 José-e-masmala Egipto-yargi warbo gwalulesmalad. Degisoggu, Jacob, e-masmala, degi, e-waganse-bakale, bela dulapaa-gakambe (70) Egipto-yargi megidapmarsundo.
28 Jacob e-idu José-daknaega Judá-barmisad, adi, José Gosén-yalaganse e-abindakdagegar. Jacob, degi, eba-danimalad Gosén-yarse nonimarsunnad. 29 Geb degi, José e-bab-abindaknaega igar-ukded, ega guakwaa ur-napagined nasikye. José Gosén-yargi e-bab-abinguargua, angaagwar e-bab-gasad. E-bab-gukingi undar bonai gusad. 30 Geb degine, Israel Joséʼga sogded:
—An gannar be-daksadba, degine, amba-dula an be-daknonikidba, emigindi, ¡an burgwer, akarsulid!
31 José e-iamarga, degi, e-bab-neguyaginmaladga sogded:
—An Faraón-owisogega, Faraón-daknagwelo. An ega sogdapoed: ‘An-iamar, degi, an-bab-e-wagan Canaán-yalagi-mamaiye, wese Egipto-yargi-megega anse nonimarye. 32 Amarde, sibad-wawaad-akwedgi, degi, moli-bebe-nikmalad-akwedgi arbamarye. Na e-sibad-wawaadmar, e-moli-bebe-nikmalad, degi, bela e-ibmarmar-nikamalad senonimarye.’ 33 Faraón bemarse gollalir, degine, bemarse egichialir, ibigi bemar arbamarye, 34 bemar abin-sogoed, bemarde gusgu be-dadganyobi sibad-wawaad-akwedgi arbamarye. Deyob be sogele, adi, nabir bemar Gosén-yalaganba megmaloed, ar ade, Egipto-dulemarga igar maisulid, dule-sibad-wawaad-akwemalad-ebo megmalad.