Ⅰ Maa na ɩ a nɩkpɛ̃ɛ lɛ sɛb a gãn nyã kʊrɔ a fʊ̃ʊ Gayus na ɩ a n baraa, ɩn nʊ̃ a yelmãɛ jũu. Ⅱ N baraa, n sʊɔrɔ na Nãaŋmɩn ɩka a fʊ ãgãn wʊ kpɛ̃mɛ ka a yele a jaa ɩ vɩla kʊ fʊ, nɩtãa lɛ a fʊ sɩɛ na kpɛ̃mɛ. Ⅲ Nʊ̃ɔ kpɛ ma naa lɛ a yɛɛr bamɩne na wa 'yɛr a lɛ fʊn turo a yelmãɛ na fʊ chiine a yelmãɛ pɔ. Ⅳ Bon jaa maa ɩ ma nʊ̃ɔ jã ɩn maa wõ ɩka a n bibiir chiine naa a yelmãɛ pɔ.

Ⅴ N baraa, fʊ tara na yelmãɛ a lɛ fʊn maala kʊrɔ a yɛɛr, ba gba na ɩ sãanba a fʊ sɛ̃. Ⅵ Ban wa, ba wa 'yɛr naa a fʊ nʊ̃fʊ kʊ a pupuorbiir a ka. Mɔ̃ na fʊ ma bar ba a sɔr a lɛ nɛ, lɛ lɛ pɛlɛ a Nãaŋmɩn pʊɔ. Ⅶ Yesu yuor jũu lɛ ba chiine, na ba maa sɔɔ de bon jaa a bala na ba ɩ a Yesu turbo sɛ̃ ɛ. Ⅷ Sɩn lɛ a sɛɛ ɩka sɩ sʊ̃ʊ ba na sɩ pʊɔ ba 'mataa tʊ̃ kʊ a yelmãɛ.

Ⅸ N sɛb sɛbile kʊ a pupuorbiir na be a fʊ sɛ̃, tɩchɛ a Diotɩrefes na bʊɔrɔ ɩka wʊ ɩ a nɩdiere, sɩn nɩ 'lɔ ba tara nɛbʊ̃'yen ɛ. Ⅹ Ala lɛ so, maa wa tɩ ɩn 'yɛr yɩ naa a lɛ wʊn yʊɔrɔ hũhũnõ ŋmara a jirsɩ 'yɔ̃ɔnɔ̃ sɩ. A lɛ tɛɛ ba lɛ ɛ, tɩ wʊ maa sɔɔ de a sɩ yɛɛr ɛ. Wʊ ma ŋmaan a bala na bʊɔrɔ ɩka ba de ba sɔr tɩ ma dii ba bar a puorfʊ jie.

Ⅺ N baraa, ta tɔɔr yeldɛɛr ɛ, tɩchɛ tɔɔrɔ yelvɩla, nɩrɛ 'lɔ na maala vɩla bɔ̃ɔn Nãaŋmɩn. Tɩchɛ nɩrɛ 'lɔ mɩ na maala dɛɛr ba bɔ̃ɔ Nãaŋmɩn ɛ.

Ⅻ Demetirus, nɩrɛ jaa 'yɛr a wʊ vɩla maalfʊ 'yɛr, a yelmãɛ mɩ din a wʊ dãasɩɛ. Sɩn mɩ din a wʊ vɩla dãasɩɛ, ka yɩn mɩ bɔ̃ɔn ɩka a sɩ dãasɩɛ ɩn sɩrɛ.

ⅩⅢ N chɛnɛ na tara yelyɔɔ ɩn taa sɛb kʊ fʊ, tɩchɛ n ba bʊɔrɔ ɩka n sɛb ɛ. ⅩⅣ A kʊ̃ lɛ kor ɛ, n bʊɔrɔ naa ɩka n nyɛ fʊ a sɩ jãnɛ 'yɛr.

ⅩⅤ Nyã'maar wʊ be a fʊ sɛ̃. A sɩ barmɩne na be ka puor fʊ naa, mɩ puor a sɩ barmɩne na be a be bʊ̃'yen 'yen.