1 Ty enta’ i Lemoela Mpanjaka,

ty onin-drehake ­nanaren-drene’e aze:

2 Anhan ry anako!

Anhan ry anake tañ’ ovako ao!

Anhan ry anako nafantoko!

3 Ko atolo’o aman’ ampela ty haozara’o,

ndra amo mpandrotsake mpanjakao o sata’oo.

4 Tsy mañeva ty mpanjaka, ry Lemoela,

tsy sazo’ i mpanjakay ty mikama divay,

ndra o mpamelek’ arivoo

ty hilelalela toake;

5 kera hinoñe naho handikoke i liliy

vaho hañamengoke

ty zo’ o anan-kasotriañeo.

6 Anjotsò toake ty heta’e,

vaho divay ty voretra añ’arofo,

7 angao hinon-dre

hañaliñoa’e ty hararaha’e,

tsy ho tiahy ka o hasotria’eo.

8 Manokafa falie hisolo ty moañe,

ho ami’ty zo’ o anam-pamàrañe iabio.

9 Manokafa falie

vaho mizakà an-kahiti’e;

ambeno ty zo’ o rarake naho mavomavoo.

10 Ia ty mahaonin-drakemba mañeva?

Ie sarotse te amo safirao.

11 Atokisa’ ty trom-bali’e,

ie tsy ho po-vara.

12 Hasoa’e fa tsy mañànto,

amy ze hene andro fiveloma’e.

13 Paia’e ty volon-añondry

naho ty vinda,

vaho an-kafaleañe ty ifanehafa’e am-pitàñe.

14 Manahake o lakam-pañondrañeo,

boak’añe ty añandesa’e mahakama.

15 Mitroatse te mbe haleñe,

hamahañe o keleia’eo,

vaho handiva amo anak’ ampata’eo.

16 Ereñerè’e ty teteke vaho vilie’e;

ambolea’e tanem-­bahe ami’ty vokam-pità’e.

17 Midian-kafatrarañe,

naho ampaozare’e o sira’eo.

18 Oni’e te soa o balibalie’eo,

tsy mikipe haleñe i failo’ey.

19 An-dravem-pità’e ty fañareta’e,

le tana’e an-delam-pità’e ty antsòli’e.

20 Velare’e amo rarakeo ty sira’e,

vaho ahiti’e amo mavomavoo o fita’eo.

21 Tsy hembaña’e i fanalay

amo keleia’eo;

fa songa misiki-mañabasà o ana’eo.

22 Anjaira’e saroñe ty vata’e,

hene leny naho malòmavo o siki’eo.

23 Fohiñe an-dalam-bey eo ty vali’e,

ie mitrao-piambesatse

amo androanavi’ i taneio.

24 Mitenoñe lamba leny re vaho aleta’e,

tolora’e sokotry o mpanao takinakeo.

25 Haozarañe naho havantañañe

ro fisiki’e, itohafa’e ty ho avy.

26 Sokafe’e an-kihitse ty falie’e,

le fañòham-patarihañe

ty am-pivimbi’e eo.

27 Halahalae’e soa o satan-keleia’eo,

vaho tsy kamae’e ty mofon-kavotroañe.

28 Miongake o ana’eo ­mañandriañ’ aze,

naho mandrenge aze i valie’ey.

29 Maro ty ampela manao soa,

fe fonga ilikoara’o.

30 Mpamañahy ty hasoa vintañe,

kòake ty hamotramotràñe,

fe rengèñe ty rakemba mañeveñe

am’ Iehovà.

31 Atoloro aze ty havokaram-pità’e!

le handrenge aze an-dalam-bey eo

o sata’eo.