Bibeli Luayãtaalá Amↄsi 2

2

1 Ma Dii ma mɛ̀:

Mↄabuↄ tàaekɛ̀ gɛ̃n àaↄ̃,

a dɛ beea se,

ma pↄ a weemáo.

Aa Ɛdↄũↄ kía gɛ kpàsa

e aà wáↄ gↄ̃̀ túfu ũ.

2 Má tó tɛ́ fɛlɛ Mↄabuↄwa,

i kũ Kelio kpɛ́ gbãaↄwa.

Mↄabuↄ gaga zĩ̀ zↄa guuɛ

gↄↄ pↄ́ wàlɛ kúkuakɛ,

wàlɛ mↄ pɛ́.

3 Má ń dↄaana tↄ̀lↄzↄ̃ɛ,

mí aà ìwaↄ dɛdɛaànↄ.

Ma Dii mámɛ má ò.

Yã́ pↄ́ a Yudaↄ ń Isailiↄ le

4 Ma Dii ma mɛ̀,

Yudaↄ tàaekɛ̀ gɛ̃n àaↄ̃,

a dɛ beea se,

ma pↄ a weemáo.

Asa aa gì ma ikoyãiɛ,

aaliↄ yã́ pↄ́ má dìlɛↄ kũao.

An tã́aↄ mɛ́ ń sãsã,

ɛɛde pↄ́ an deziↄ tɛiↄ.

5 Má tó tɛ́ fɛlɛ Yuda bùsuwa,

i kũ Yelusalɛũ kpɛ́ gbãaↄwa.

6 Ma Dii ma mɛ̀,

Isailiↄ tàaekɛ̀ gɛ̃n àaↄ̃,

a dɛ beea se,

ma pↄ a weemáo.

Aaì gbɛ̃maaↄ yía zↄↄ ũ ↄ̃a yã́i,

aaì taasideↄ yía kyale fĩaboanɛ yã́i.

7 Aaì ↄ̃zↄ̃ wɛ̃nadeↄwa bùsu'ũfãau,

aaì gbãasaideↄ yã́ málɛnɛ́.

Nɛ́ ń a maeo aaì gbada wɛ̃́ndia doũwa,

aaì ma tↄ́ pↄ́ a kua adoa ↄ̃̀ↄkpa.

8 Aaì ń wó poo sa'okĩiↄ saɛ píi

zwãa pↄ́ aa a tↄ̀ↄmasìmáↄwa.

Aaì vɛ̃ɛ lú ń ↄ̃a pↄ́ aa sìmáo

aa mi ń tã́akpɛu.

9 Mámɛ ma Amↄleↄ kàalɛɛ́ yãa,*

baa kɛ́ aa gbã̀a lán sɛdɛ líↄwa,

mɛ́ aa gbãa lán sɛ̃́ gↄ̃n giiwa.

Ma ń kaalɛ píi, nɛ́fɛ̃nɛn gbɛ̃zↄ̃ↄ.

10 Mámɛ ma bↄánↄ Egipi,

ma dↄaaɛ́ guwaiwaiu wɛ̃̀ bla,

má tò Amↄleↄ bùsu gↄ̃̀ á pↄ́ ũ.

11 Ma á nɛ́eↄ dìlɛ ãnabiↄ ũ,

má tò á ɛ̀waasoeↄ ńzĩa kpàa.†

Isailiↄ, sĩana málɛ oɛ́o lò?

Ma Dii mámɛ má ò.

12 A naɛ gbɛ̃́ pↄ́ aa ńzĩa kpàapiↄwa aa vɛ̃ɛmi,

á dìlɛ ãnabipiↄnɛ aasu ãnabikɛkɛ lↄo.

13 À ma! Má á kɛ dɛ̃́ↄdɛ̃ↄɛ,

lán zugo pↄ́ pↄ́wɛn aso sɛa ì pↄ́ kɛ dɛ̃́ↄdɛ̃ↄwa.

14 Gbɛ̃́ kàsakasaↄ bↄkĩi eo,

gↄ̃saↄ e bↄ ń gbãa yã́io,

nɛgↄ̃naↄ e ńzĩa misio.

15 Kàzunaↄ fↄ̃ zɛ gio,

bàwãadeↄ e bↄo,

sↄ̃deↄ e ńzĩa misio.

16 Baa nɛgↄ̃n wↄ́ↄdeↄ

aa bàasi ↄgii gↄↄ beeɛ.

Ma Dii mámɛ má ò.

*2:9 Iko 3.8-10

†2:11 Nao 6.1-8