Bibeli Luayãtaalá Yobu 15

Yobu
<
15
>

15

Vãikɛna lí bↄ pão

1 Ɔ̃ Temani gbɛ̃́ Ɛlifaza wèwà à mɛ̀:

2 Ɔ̃nↄna a yãpã gii bee taa oa?

A lɛ́ ɛlɛ yã́ↄ bↄlɛwà yã̀?

3 A lɛkpaakɛ yã́ àisai musua?

A yã́ kã́fĩasai oa?

4 Mpi sↄ̃ ńlɛ vĩakɛa Luaɛ bãdɛ sa,

ńlɛ kpá gbɛ̃́ↄnɛ aa làasookɛwà.

5 Vãi pↄ́ ń kũa mɛ́ dↄ n lɛ́u,

kↄ̃nide lɛ́ mɛ́ dↄma.

6 N lɛ́ mɛ́ n dayãu, i kɛ mámɛo,

n lɛ́ mɛ́ n kalikɛ̃̀.

7 Gbɛ̃nazĩn sɛ̃́ian n ũa?

Wà n i e wàↄ gɛ́ gbɛ̀sĩsĩↄ kɛia?

8 N Lua lɛkpaaĩa ń a gbɛ̃́ↄ màa?

Ḿmɛ ń ↄ̃nↄ vĩ ndoa?

9 Yã́ kpele ń dↄ̃ mɛ́ wá dↄ̃o ni?

N wɛzɛ̃ dɛwála yã̀?

10 Gbɛ̃zↄ̃ↄↄ ń mikãpuadeↄ kúwanↄ,

gbɛ̃́ pↄ́ an zↄ̃ↄ dɛ n maelaↄ.

11 Lua ye n nↄ̀sɛ níninɛ,

ↄ̃ à kɛ̀nɛ fɛ̃́nɛũa?

Wálɛ yã'onɛ busɛbusɛo lé?

12 Bↄ́mɛ n sↄ̃ blèi?

Bↄ́yãi ńlɛ wá gwa ń wɛpãsĩoi?

13 N pↄ paa Luazi,

ↄ̃ yã́ dasi ì bↄlɛ n lɛ́u.

14 Bↄ́n gbɛ̃nazĩna ũ kɛ́ àↄ ku gbãlɛsaii?

Gbɛ̃́ pↄ́ nↄɛ aà ì aↄ maaa?

15 Lá Lua ì a malaikaↄ náaikɛo,

mɛ́ aà bɛ i kɛɛ̀ gbãlɛsaio,

16 wa gbɛ̃nazĩna pↄ́ o lↄe?

A bɛ̃̀ɛ, a ↄ̃̀ↄkpaa, ì yãvãi mi lán íwa.

17 Má yã'onɛ, swã́sɛi!

Má yã́ pↄ́ ma swã́ mà sɛ́lɛ mà siunɛ.

18 Ɔ̃nↄnaↄ mɛ́ bↄ̀ ń yã́pio,

aai yã́ pↄ́ an deziↄ ò kee ulɛwɛ̃ɛo.

19 Aamɛ ń bùsu vĩ ńtɛ̃ɛ,

zĩ̀loe i zↄ̃lɛ ń guuo.

20 Gbɛ̃vãi ìↄ ku dɛ̃ɛu e a wɛ̃ni lɛ́uɛ,

gbɛ̃́ pãsĩ gↄↄ lɛ́ kuɛ.

21 Kↄ̃fĩ iwãakampↄade ìↄ dↄ aà swã́u,

aà aafia gↄↄ gbãamↄnɛdeↄ ì lɛ́lɛwà.

22 A ɛa bↄa gusiau náai vĩ lↄo,

dɛa ń fɛ̃ndao mɛ́ lɛ́ aà dã́.

23 Ìↄ liaaliaa, ìↄ mɛ blɛ ku má ni?

A dↄ̃ kɛ́ a kua bɛda gusiau kãikũ̀.

24 Taasi ń yeelɛao ìↄ aà vĩakũ,

a daaàla lán kía pↄ́ a lɛ́lɛama sↄu màwa.

25 Asa à ↄsɛ̀ Luaziɛ,

à kuabìi Gbãapiidewaɛ.

26 À sùwà ń waakĩba bↄbↄawào

ń a sɛ̀ngbao gèele kↄdeo.

27 Baa kɛ́ aà oa nísi bↄa,

mɛ́ a mɛkpaa, aà gbↄ̃u lɛ̀ɛlɛ,

28 a zↄ̃lɛ uazĩ pↄ́ wìli gɛ̃uoↄ guu,

wɛ̃́lɛ pↄ́ wa wì, a kpɛ́ↄ gↄ̃̀ wɛ̀ɛwɛɛↄu.

29 Aà àizɛɛ a gↄↄplakɛo,

aↄ dɛ ↄde ũo,

pↄ́ pↄ́ a vĩoↄ ligua lↄo.

30 A e bↄ gusiauo,

tɛ́lɛpiↄ a aà vlãpaa sãsã,

Lua lɛ́'ĩana i aà sɛ gɛò zɛ́a.

31 Asu pↄ́ gia náaikɛ à azĩa sã́são,

asa pↄ́ gia mɛ́ aↄ aà asea ũ.

32 Yã́pi a aà le e aà gↄↄ àↄ gɛ́ pai,

aà gↄ̃naↄ e ↄtao.

33 A gↄ̃ lán kuli pↄ́ a vú wòlowaɛ,

lán vɛ̃ɛli pↄ́ a nɛsoena wòlowa.

34 Luayãdansaiↄ gãli a báaa kɛo,

tɛ́ a kũ gbagusaɛdanaↄ kpɛ́wa.

35 Aaì yãkele nↄsi, aaì nɛ'i yã'ĩa ũ,

mↄafili mɛ́ ì bↄ ń nɛasakpɛu.

Yobu
<
15
>