21
Vãikɛna ì namable
1 Ɔ̃ Yobu mɛ̀:
2 À swã́kpa à ma yãma,
ↄ̃mɛ a ma nↄ̀sɛ nínimɛɛ.
3 À mɛnakɛmɛɛ mà yã'o,
ma yã'oa gbɛa í ma àlafiikɛ.
4 I kɛ gbɛ̃nazĩna málɛ zↄakaio.
Ma pↄyaa zɛvĩo lé?
5 À ma gwa, yã́pi i diwá,
í ↄku á lɛ́wa.
6 Tó ma làasookɛ̀ ma yã́wa,
gili ì gɛ̃magu, mi lualua.
7 Àkɛa vãikɛnaↄ ìↄ ku,
aaì zi kṹ, an gbãa ìↄ kã́fĩi?
8 An nɛ́ↄ ì zĩ́napɛlɛ ń wáa,
aaì wɛsi ń buiↄ gbãakũalɛ.
9 An bɛdeↄ ìↄ ku aafia,
vĩa lí ń kũo, Lua lí gotↄ̃máo.
10 An gáaeↄ ì ku zudaↄwa, aali fuao,
an zudapiↄ lí nↄbↄlɛo, aaì nɛ'i.
11 Aaì ń nɛ́ↄ gbaɛ kↄ̃̀ↄ'oi lán sã kpàsawa,
an nɛ́fɛ̃nɛnaↄ ì vĩvĩ lán blenɛↄwa.
12 Aaì lɛsi ń gã̀ao ń mↄↄnao,
aaì kↄ̃̀ↄ'o ń kulɛpɛao.
13 Aaì zikũ ń namao,
aaì ta bɛdau niɛniɛ.
14 Kási aaì o Luaɛ: Gowála,
wá ye wàↄ bɛ n zɛ́uo.
15 Démɛ Gbãapiide ũ wà zↄbleɛ̀i?
Tó wa kulɛkɛ̀ɛ̀, bↄ́ ài wá ei?
16 Kási an nama lɛ́ bↄ ń kĩ́io.
A yã́i mi gbɛ̃vãiↄ lɛdama bee sio.
17 Vãikɛnaↄ filia ì gamá mↄ̀ↄmↄↄe?
Lua pↄkũma lí tó músi ń lé dasio.
18 Ĩana ì ń sɛ́lɛ lán ése ṹawae?
Zàa'ĩana ì ń waa lán sɛ̃wae?
19 Lua ì vãi pↄ́ gbɛ̃́ kɛ̀ wi aà nɛ́ↄ musuɛ.
Lua fĩabo adeɛ gↄ̃̀ↄ, aà dↄ̃!
20 Aà wɛsi azĩa ↄ̃̀ↄkpaalɛ!
Gbãapiide pↄkũma imibↄ dↄɛ̀ aà mi!
21 Yã́ pↄ́ a aà bɛdeↄ le aà gaa gbɛa,
ìli a kã̀akɛo.
22 Lá Lua ì yã́gↄ̃gↄ̃ musudeↄnɛ,
wa fↄ̃ yãdaɛ̀e?
23 Gbɛ̃eↄ ì ga ń àizɛɛ zↄ̃ↄo,
aa namablè bɛ́lɛbɛlɛ.
24 Vĩ ìↄ di, an taↄ pai yɛlɛlɛ,
an wá ìↄ gbãa, aaìↄ mɛkpaa maamaa.
25 Gbɛ̃eↄ ì ga ń nↄ̀sɛyaao,
zaa aa ku, aai pↄmaa e wa blèo.
26 Aaì wúlɛ gudoũ tɛ̃́ɛnauɛ,
aaì kↄ̀ↄka ḿpla ḿpii.
27 Á èa? Má á làasooↄ dↄ̃
ń kↄ̃ni pↄ́ álɛ kɛmɛɛo.
28 Asa i mɛ: Gbɛ̃zↄ̃ↄ bɛ kú má saɛ?
Vãikɛnaↄ ua gↄ̃̀ bɛzia ũ.
29 Ili yãlala wɛ̃́lɛgɛnaↄwao lé?
Á yã́ pↄ́ aaì o fãn vĩo lé?
30 Gbɛ̃vãi ì bↄ músikɛgↄↄ,
pↄe lí aà le taasikɛgↄↄo.
31 Démɛ ì zↄadↄwài?
Démɛ ì fĩaboɛ̀ aà yãkɛawai?
32 Wì aà sɛ wà gɛò gɛvĩkĩi,
wì itɛ̃kɛ aà mia dↄngubↄwa.
33 Swa saɛ bùsukↄ̃ↄtɛ̃ↄ ì kɛɛ̀ na,
gbɛ̃́pii tɛaàzi we, mɛ́ wì dↄaaɛ̀ dasi.
34 Á fↄ̃ ma nↄ̀sɛ níni ń á yãpãoe?
Yã́ pↄ́ álɛ weaá zĩbↄnkpɛ yã́ɛ.