3
Uamuli wa Mwenyezi Mlungu
chinyume cha Ninawi
chinyume cha Ninawi
1 Shauriyo uwe mudzi uriye na aolagadzi anji,
mudzi urio tele atu a handzo na anyangʼanyi,
na kuhala atu mateka kusikosira.
2 Phundzani hinyo mriro wa mijeledi na kuvye-kuvye ya magurudumo,
farasi anavyodzimwirika na magari ga kuvwehwa ni farasi ganavyotina-tina.
3 Apandadzi-farasi anashambuliya,
panga na mafumo ganameka-meka.
Anji akalumizwa
nyufu zirere tandala
miri isiyoolangika
hata nyo anajeshi ashambuliyao anazikpwala.
4 Gaga gosi gandakala
mana uwe Ninawi ukakala malaya.
Ukavutiya atu kpwa utsaio
ukahenda atu a mataifa ganjina kukala atumwa kpwa umalayao na utsaio.
5 Mwenyezi Mlungu, Mlungu wa majeshi anaamba,
“Mimi ni chinyumecho
ndafwenula na kuunula nguwozo hata zifwinike usoo,
ili atu a mataifa ganjina gosi aone chitsahacho
na falume zione waibuo.
6 Nami ndakuhendera chibero.
Nindakumwagira uchafu
na nkuhende ukale utu wa kuberwa.
7 Chisha nyo ndiokuona andadzitenga nawe na kuamba,
‘Ninawi ukabanangbwa tse, ni ani ndiyekusononekera?’
Atu dza hinyo ndaaphahaphi?”
8 Kpwani Ninawi ina unono wani kuriko Thebesi?* 3:8 Thebesi kala ni mudzi mkpwulu wa Misiri, piya Chieburania wiihwa No-Amoni.
Mudzi uriodzengbwa kahi-kahi ya mikono ya muho Naili.
Ni mudzi uriozungulukpwa ni madzi
nago kala ndio urindzi wao dza ukuta.
9 Nguvu za Thebesi kala ni Kushi na Misiri
tsi zoipha nguvu zisizosira.
Msada wa Thebesi kala ula Puti na Libiya.
10 Ela gago tagayaokola chitu.
Thebesi yatekpwa
na atue achitsamizwa kpwa lazima.
Ana aho atsanga abundwa na photsi, phenye mawe hadi achifwa
kpwenye maganiko ga nyo mudzi.
Vilongozi a nyo mudzi afungbwa silisili,
na go maadui gao achiaganya kpwa kuapigira kura.
11 Mwimwi atu a Ninawi piya mundadedeleka dza mutu achiyelewa,
mundadzifwitsa
na kuendza ngome za kudzifwitsa ili maadui gasikuoneni.
12 Ngome zenu zindakala dza mitini
iriyo na matunda ga kpwandza ga kuivwa
ndiphozuguzwa tu
zindagbwa kanwani mwa azuguzaye.
13 Lolani nyo anajeshi enu
akakala anyonje kahi-kahi yenu.
Maryango ga tsi yenu
ga mwaa kpwa aviha enu
magbwama ga maryango gakasira kuphya na moho.
14 Hekani madzi muike akiba
mana mundazangirwa ni maadui.
Tigani ulongo mtengeze matofali
ili mudzenge ngome zenu zidine.
15 Hata muhendedze mudzi wenu undaochwa
na mwi enye muolagbwe kpwa upanga.
Mwimwi mundaangamizwa dza viratu ndzije aryavyo mimea.
Enjerezekani dza mabandzi,
enjerezekani dza ndzije!
16 Mwaenjereza ahendadzi-bishara
achikala anji kuriko nyenyezi,
ela muna tabiya dza ya ndzije, aho nkurya chila mmea
chisha akauruka kuphiya vyao.
17 Arindzio ni dza mabandzi,
na atumishi a mfalume wenu ni dza maipho ga ndzije
gagbwago kutani siku ya mnyevu
ela dzuwa richiala, aho nkuuruka akaangamika
akakala taandaoneka tsona.
18 We mfalume wa Ashuru,
vilongozio arere na kogo.
Atuo akaenea ko myangoni
na taphana mutu wa kuakusanya phamwenga.
19 Uwe u dza mutu achiyetiywa chironda
chironda ambacho tachina dawa.
Chila mutu asikiraye kugbwako,
anapiga makofi kpwa kuhererwa.
Mana takuna mutu hata mmwenga
ambaye kumuhenderere uyio.