इब्रितोरेनाह्क लोहतद सीटि
इद सीटटुन बोग़ रासतोग़, अद पोल्लो इगा वेहतद इले. इद सीटि रासवाल तिपलते मतोर यहुदि विस्वसिरिह्क रासतोग़.
इद सीटटुन बाराह्क रासतोग़ इतेके, यहुदि विस्वसिर तिपल वाताह्कु, तमा विस्वसतुन विळ्सलाह आसोर मतोर, अदिह्क येसु, देवुळता मग़ि मन्जाय, तिपल वातस्के आपिस मनजि तना बाबाना पोल्लो केंजिंदोग़; ओना मग़ि आताह्कु, ओना कबुर वेहवालोरिह्काय, पोग़ोटाङ देवतुल्किह्काय, मोसाह्काय वने एक्वा बेरोग़. अमेसातुह्क ओग़े पेर्माल; पाळ्ना सास्त्रमतोर सबेटोर पेर्मालोरिह्काय एक्वा बेरोग़. ओन विस्वस कीतेक अचोन, पापमताहि, रेयताहि, हामुरताहि विळ्सिह कीस्तोग़; इनजोर इद सीटि रासवाल विस्वसिरिह्क तोहचीयलाह आतोग़. इस्रयेल मन्कलोरा तादोर-बाबोरा विस्वसतुन तोहच मनजि “मीट वने आक्रि एवनाह विस्वस विळ्सवा निच मन्ह्टु” इनजोर इनदलाह आतोग़.
1
देवुळि तना पूरा कबुरतुन तना मग़ना मेटे मारिह कीता
1 मुनेता कालमते देवुळि मावा तादोर-बाबोरा संगे वळ्ह्किंदु. ओरिन पिंगम-पंगम वळ्ह्को; मति तना कबुरतोरा मेटे ऊक-ऊके अलग-अलग रीतिने तना पोल्लो वेहंदु. 2 मति इंजेके, इद आक्रिता कालमते बार तना मग़िन लोहता, लोहचि ओना मेटे मावा संगे वळ्ह्कता. ओनाय मेटे इळ्ता पोग़ोटा बूमतगा मनदनव सबेटविस्किन पंडटा. पंडिसि ओनाये अदिकरते सबेटविन ईसीता. 3 ओनगा देवुळता डीसा दींचिह्ता, देवुळि बेद्रमता इनजि ओनगाने माक बराबर दिसिह्ता. ओग़ तना पोल्लोता लावते सबेटविन आव्रे कीस्तोग़. मन्कलोरा पापमतुन एडिह कीतापया पोग़ोन मनदनद बेरा डीसाता देवुळता तिनळ बाजे राजेम ताकिह कीयलाहि उदतोग़.✡ 1:3 देवुळताङ पाटाङ 110:1
देवुळता मग़िये सबे देवतुल्किह्काय बेरोग़
4 इद्रमलेह्का देवुळि तना मग़िह्कु देवतुल्किह्काय एक्वा अदिकर ईता, इतेके ओग़े देवतुल्किह्काय पका बेरोग़. 5 देवुळि तन मग़ना लोप्पा इद्रम इता:
निमा नावा मग़निन,
नेटाहि नना नीवा तपेनन.✡ 1:5 देवुळताङ पाटाङ 2:7
इनजोरे ओसो,
नना ओना बाबानन मनदकन,
ओग़ नावा मग़ि मनदनोग़.✡ 1:5 2 शमूएल 7:14
इनजोर वने पोग़ोटाङ देवतुल्किन बेदिने बेस्केन देवुळि इनो. 6 ओसो, तना बेरा अदिकरता मग़िन देवुळता जागातगा ततह्पा देवुळि इता,
“नावाङ सबे देवतुल्क ओन दंडुम अरयिङ,”✡ 1:6 देवुळताङ पाटाङ 97:7
इनजोर इता. 7 देवतुल्कना लोप्पा इतेके इद्रम इन्ह्ता:
“नावा सेवा कीयनव नावाङ देवतुल्किन,
वळ्दा लेह्कान पंडटन, मळ्गनद किसता लेह्कान पंडटन,”✡ 1:7 देवुळताङ पाटाङ 104:4
इनजोर इन्ह्ता. 8 मति तना मग़िन बार इद्रम इता:
“ए देवुळतिन, नीवा राजकुर्सि अमेसातेनाह्क मनदग़ा,
नीवा राजेम कीयनद सेतेम मन्ह्ता.
9 सेतेम नीक बेस विचर वास्ता,
लाग्वद नीक मुर्तिय विचर वावो.
अदिनेनाह्क नना नीवा देवुळतन,
नीवा संगेतोरग्डाहि नीके गिर्दा वानाह राजाल आयलाह आचतन. ✡ 1:8-9 देवुळताङ पाटाङ 45:6-7
10 सामि! सुरुमुने निमान पूरा बूमता जोता दोहतोनिन,
निमान पोग़ोटा बूमतगा मनदनव सबेटविन पंडटोनिन.
11 निमा अमेसा मनदकिन; मति निमा पुटिह कीतव मायनुङ.
सबे पाळ्नाङ गेंदेन पोहतना लेह्का, अविस्किन पोहमुळ आयग़ा;
12 पाळ्ना गेंदेतुन ऊर्हतना लेह्का,
निमा अविस्किन ऊर्हचि मळता वाटकिन.
गेंदेनु बद्ले कीयना लेह्का अविस्किन बद्ले कीकिन
मति निमा मुर्तिय बद्लेम आयविन आयकिन.
निमा अमेसा-अमेसातुह्क मनदकिन.”✡ 1:12 देवुळताङ पाटाङ 102:26,27
इनजोर इता. 13 इदिन ओसो सीता कीम्ह्टु: देवुळि तना मग़िन इतद इद पोल्लोतुन तनाङ बेवे देवतुल्किन बेस्केन इद्रम इनो:
“बेचानाह नना नीवा कोटुलतोरिन नीवाङ काल्कना इळ्न तच एवोन,
अचानाह नावा तिनळ बाजेता राजगादेतगा उदिस मन,”✡ 1:13 देवुळताङ पाटाङ 110:1; मत्याल 22:44; मार्कल 12:36; लूकाल 20:42-43; बळयिर 2:34-35
इनजोर इनो. 14 पोग़ोटाङ देवतुल्क राजेम कीयनव आयोङ, देवुळता सेवा कीयनव जीवाङ. बोर-बोरिह्क देवुळता पिसमुळ दोर्किह्ता, ओरा सेवा कीयलाहे अद लोहतनव जीवाङ आंदुङ.