15
आक्रिताङ एळुङ पीळाङ पोयतव देवतुल्कु
1 पया देवुळदीपतगा ओसो उंद सीना ऊळतन. अद सीना बेरा मता; अहे बामना लेह्काडा मता. अद इद्रमि: एळुङ बेराङ पीळान पोसि एळुङ देवतुल्कदेवुळदीपतगा मताङ. इव आक्रिताङ पीळा आंदुङ. इव पीळाङ आतापया देवुळता ओङ रेगग़ा. 2 ओसो सम्दुर लेह्काडादिन ऊळतन. अद काचता लेह्का ओसो किस काल्पतप लेह्का दिसिंदु. बोर मन्कलोर, जन्वर, ताना बोमा, ताना पेदिरता लेका, इव पोल्लोङ केंजवा तान गेल्सतोर, ओर अद सम्दुरता दडटगा निच मतद ऊळतन. ओर देवुळि ईतव जेतुर्क पोस निच मतोर. 3 ओर देवुळता सेवातोग़ मोसा मुय्तोना पाटातुन ओसो गोरे पिलाता पाटातुन इद्रम वाग़तोर:
“ए सामि देवुळतिन, बेरा लावतोनिन!
नीवाङ कबस्क बेराङ! बामिह कीयनव मन्ह्ताङ,
निमा सबे जातिनोरा राजानिन!
निमा बेदाय कीतेके निटमे कीय्ह्निन, सेतेमते कीय्ह्निन.
4 ए देवुळतिन! सिरप निमन पवित्रतोनिन!
अदिनेनाह्क नीक बोग़ रेयोग़ आयनोग़?
नीवा पेदिर पोस बोग़ जोहर केवोग़ आयनोग़?
नीवा नेयमताङ कबस्किन सबेटोर ऊळतोर.
अदिनेनाह्क सबे जातिनोर नीवा मुनेह वासि मोळ्कनुर,”
इनजोर वाग़तोर.
5 पया देवुळदीपतगा साक्सिता रावुळि मता. ताना लोप्पा पवित्र जागातुन तेग़ियतदिन नना ऊळतन. 6 अग्डाहि एळुङ बेराङ पीळान पोयतव, एळुङ देवतुल्क पेसताङ. अव उहच मतव गेंदेङ पूरा कुलुल मताङ, पूरा वेडिस मताङ, मांजसोर मताङ. अव देवतुल्क तमा अर्युलतगा बंगरता पटा तोहच मताङ. 7 पया नालुङ जन्वर्कनग्डाह उंद बह कीता इतेके, अव एळुङ देवतुल्किह्क, बंगरताङ एळुङ कस्लाङ ईता. अव कस्लाङ अमेसा-अमेसा जीवात मनदनद देवुळता ओङते निंदिस मताङ. 8 देवुळता डीसा ओसो लाव पूरा मंदिरतुन पोयाते निहता. एळुङ देवतुल्क पोस मतव एळुङ बेराङ पीळाङ मारनाह, बोरे मंदिरतगा ओळिय पग़वोर.