1 Tevangi a, Nengazen,

su wazè en etew he nesamà he metinumanen wey egkeseriǥan.

2 Langun he menge etew ne ebpemenarùtarù diyà te menge zuma zan.

Egemiten dan is meungangen he menge lalag te kebpenlimbung dan.

3 Deyzey pezem Nengazen ke ibpetiem nu sikandan is ebpemenlimbung pinaaǥi te meungangen he menge lalag wey sikan is menge gelbuwen.

4 Ke sikandan te,

“Ebmezeeǥen key pinaaǥi te kebpahambug dey.

Ebpekehimu key he egkaǥi te minsan hengkey he egkesuatan dey,

ne wazà ebpekezawey kenami.”

5 Migkaǥi is Nengazen te,

“Edtevangan ku is menge egkaayuayu su edèdaaǥen sikandan,

ne utew subra is kebpekeantus dan.

Egkelesaǥan ku sikandan su iyan heini ebperetengen dan.”

6 Egkeseriǥan utew is menge saad te Nengazen.

Iring heini te pelata he ebpekesarig ki he lunsey heini

su kepipitu ipaaǥi ziyà te hapuy para maawà is menge sahug din.

7  Nengazen, layun key kenikew ventayi,

ne ilikey key te lalung he menge etew te minsan hengkey he timpu.

8 Su nekeelingkus kenami is lalung he menge etew

ne edeliǥen pa te kezekelan is kelelalung dan.