60
Alatalaa binyen Yerusalɛn yi
1 Ɛ keli, ɛ yanban,
amasɔtɔ ɛ kɛnɛnna bata fa.
Alatalaa binyen bata te
alo sogena, a dɛgɛma ɛ xun ma.
2 Ɛ a mato, dimin bata sin bɔxɔn ma
e nun dimin gbeen yamanane xun ma,
koni Alatala bata mini kɛnɛnni ɛ tan xun ma,
a binyen yi godo ɛ ma.
3 Siyane sigan tima ɛ kɛnɛnni
ɛ mayiyalanna yi kɛnɛnna fi mangane ma
alo sogen tematɔna.
4 Ɛ yɛɛ rakoɲin ɛ rabilinni:
birin e malanma, e fama ɛ fɛma.
Ɛ dii xɛmɛne fama sa keli yire makuyeni,
ɛ dii tɛmɛne maxalima muxune yii kanke.
5 Ɛ na a to, ɛ sɛwan gboma ayi nɛn,
ɛ bɔɲɛn dinma nɛn sɛwani, ɛ ɲaxan,
bayo fɔxɔ igen nafunle e xun sama ɛ ma nɛn,
siyane nafunle yi fa ɛ ma.
6 Ɲɔgɔmɛ kurune luma nɛn ɛ yamanan birin yi,
Midiyan nun Efa bɔnsɔnne ɲɔgɔmɛ kɛndɛne.
Muxune birin fama nɛn xɛmaan nun wusulanna ra ɛ xɔn
sa keli Saba yamanani,
e fa Alatalaa binyen naliyɛ.
7 Kedari* Kedari findixi Sumayilaa diin nan na. Na feen sɛbɛxi Dunuɲa Fɔlɔn 25.13 kui. bɔnsɔnna xuruse kurune birin malanma nɛn ɛ konni,
Nebayoti bɔnsɔnna xuruseene luma nɛn ɛ sagoni,
e ba saraxa gan daxine ra n ma saraxa ganden fari,
e yi rafan n ma.
N yi a liga n ma banxi nɔrɔxin yi nɔrɔ han!
8 Ndee ne ra
naxanye tuganma alo kundana,
alo ganban naxanye tuganma siga e tɛɛn ma?
9 Ige tagi bɔxɔne yigi saxi n tan nin,
Tarasisi kunkine sigama kunkin bonne yɛɛ ra,
sa fa ɛ diine ra sa keli yire makuyeni
e nun e gbeti fixɛn nun e xɛmana Alatalaa xinla fe ra, ɛ Ala,
Isirayilaa Ala Sariɲanxina,
naxan nɔrɔn fixi ɛ ma.
10 Xɔɲɛne mɔn ɛ taan makantan yinna tima nɛn,
e mangane yi findi ɛ walikɛne ra,
bayo n na ɛ ɲaxankata nɛn n ma xɔlɔ gbeeni,
koni n kininkininma nɛn ɛ ma n ma hinanni.
11 Ɛ taan so dɛɛne luma nɛn nabixi habadan,
e mi balanɲɛ kɔɛɛn na e mi balanɲɛ yanyin na,
alogo siyane nafunle xa so ɛ konni,
e nun e mangane nun e fɔxɔ ra birane.
12 Bayo, siyaan nun yamanan naxanye mi walɛ ɛ tan xa,
ne halagima nɛn.
E raxɔrima nɛn fefe!
13 Liban yamanan binyen fama nɛn ɛ konni,
fɔfɔne nun gbinɲɛne nun xarinne birin
alogo e xa fa n ma yire sariɲanxin nayabu,
alogo n xa n san tiden binyen nagbo ayi.
14 Ɛ ɲaxankata muxune diine fama nɛn,
e fa e felen ɛ yɛtagi,
muxun naxanye ɛ raɲaxuxi,
ne birin yi fa e xinbi sin ɛ bun ma.
E yi a fala ɛ ma,
a “Alatalaa taana,
Isirayilaa Ala Sariɲanxina taana, Siyon.”
15 Ɛ yi rabeɲinxi, ɛ raɲaxu,
muxu yo mi yi fa danguma ɛ konni.
Iki, n xunna kenla fima ɛ ma nɛn habadan,
n yi ɛ findi sɛwa xunna ra mayixɛtɛ nun mayixɛtɛne xa.
16 Ɛ siyane nun e mangane nafunle donma nɛn,
nayi, ɛ yi a kolon
a n tan nan Alatala ra
naxan ɛ rakisima,
ɛ xunbamana, Yaxubaa Ala Sɛnbɛmana.
17 N xɛmaan nafama nɛn ɛ ma sulan ɲɔxɔni,
e nun wure gbetina wure fɔrɛn ɲɔxɔni.
N sulan nafama ɛ ma nɛn wudin ɲɔxɔni,
e nun wuren na gɛmɛn ɲɔxɔni.
N yɛɛratine nun kuntigine fi ɛ ma
naxanye bɔɲɛ xunbenla nun tinxinyaan nasoma.
18 Gbalona fe mi fa mɛma ɛ yamanani,
hanma kalana hanma halagina ɛ bɔxɔn danne ra,
ɛ yi ɛ taan makantan yinna xili sa “Marakisina,”
ɛ yi ɛ taan so dɛɛne xili sa “Tantunna.”
19 Sogen xa mi fa findima kɛnɛnna ra ɛ xa yanyin na,
hanma kike dɛgɛna kɔɛɛn na,
koni Alatala nan fa findima kɛnɛnna ra ɛ xa habadan,
ɛ Ala yi findi ɛ binyen na.
20 Sogen mi fa birama ɛ konni sɔnɔn,
kiken mi fa godoma ɛ konni,
bayo Alatala nan findima kɛnɛnna ra ɛ xa habadan
ɛ sunu lɔxɔne yi ɲan.
21 Nayi, tinxin muxune nan tun fa luma ɛ yamanani,
yamanan findima nɛn e gbeen na habadan.
E tan findima nɛn n ma sansi sonla ra,
n naxan sixi n yiine ra,
alogo e xa n ma binyen makɛnɛn.
22 Naxan xurun ɛ tagi,
na muxu wuli keden naminima nɛn,
muxudina ɛ tagi,
na bɔnsɔnna yi findi siya sɛnbɛmaan na.
N tan Alatala,
n na feene rabama nɛn mafurɛn,
e waxatin na a li.