9
Yubaa yabina
1 Yuba yi a yabi, a naxa,
2 “Ɲɔndin na a ra,
n na a kolon a na kii nin,
anu adamadiin nɔɛ tinxinɲɛ ayi di
Ala yɛɛ ra yi?
3 Xa muxuna nde waxi Ala matandi feni,
hali Ala a maxɔdin sanɲa ma wuli keden,
a mi a yabɛ hali keden pe.
4 Fekolonna nun sɛnbɛn birin a tan nan xa.
Nde nɔɛ Ala matandɛ,
na feen mi saran a ra?
5 A geyane bama e funfuni,
a mi e rasogin,
a yi e raxuya ayi a xɔlɔni.
6 A bɔxɔn naxuruxurunma a dɔxɔdeni,
a yi bɔxɔn bunne raxuruxurun.
7 A na falan ti sogen xa,
sogen mi tema,
a yi sarene ratagan dɛgɛ.
8 A tan nan keden koren daxi,
a sigan ti fɔxɔ igen mɔrɔnne fari.* Igen mɔrɔnne: alo foyen na so igeni.
9 A bata Kanko Gbee sare kurun
nun Donso sare kurun
nun Dii Tɛmɛ Solofere sare kurun
nun yiifari fɔxɔn sarene da.† Mɛn kaane yi sare kurune yatɛxi nɛn alo se sawurane, e yi na sare kurune xili sa na seene xun ma.
10 A fe gbeene ligama
muxun mi naxan famunɲɛ,
a kabanako feene liga
naxanye mi nɔɛ yatɛ.
11 A danguma n dɛxɔn ma,
n mi a toma.
A lɔma ayi, n mi a yigbɛma.
12 A naxan xasunxi fangani,
nde nɔɛ na bɛ a yii?
Nde susɛ a maxɔdinɲɛ,
fa fala, ‘I nanse ligama?’
13 Ala mi xɛtɛma a xɔlɔn fɔxɔ ra,
hali ige yi ninginangan Raxabi
nun a walikɛne xinbi sinxi Ala bun ma.”
14 “Nayi, n tan nɔɛ a yabɛ nanse ra?
N falan mundun tiyɛ a yɛtagi?
15 Hali n tinxin, n mi a yabɛ,
n na n makiti muxun nan mafanma.
16 Hali n na a xili, a yi a ratin,
n mi lɛ a ra xa a tuli matiyɛ n xuiin na.
17 Amasɔtɔ a bata n halagi foye ɲaxin na,
a yi n ma fure dɛɛne rawuya ayi,
bun mi naxan ma.
18 A mi tinma n yi yengi a faɲin na,
koni a n nalugoma xɔlɛn nan na.
19 Nde sɛnbɛ gbo dangu birin na,
xa a tan mi a ra?
Nde n xilima kiti sadeni,
xa a tan mi a ra?
20 Hali n yi tinxin,
a n yalagima nɛn n ma falane xɔn.
Hali sɔntaren nan yi n na,
a yi n yitɛ sɔnmaan na.
21 Sɔntaren nan n na,
koni n mi fa n yɛtɛ yatɛxi,
n bata n mɛ n niin na,
22 a birin keden,
nanara n na a falama fa fala
a Ala sɔntaren naxɔrima nɛn
alo muxu ɲaxina.
23 Xa gbalon fa, a faxan ti sa,
Ala sɔntarene tɔrɔyaan magelema nɛn.
24 A dunuɲa sama muxu ɲaxine sagoni,
a yi kitisane yɛɛne raxi.
Xa a tan mi a ra,
nde fa a ligɛ?”
25 “N ma siimayaan mafura danguɛ
dangu gilaan na,
n ma lɔxɔne e gima,
n mi hɛrin toma,
26 e mafura alo kunki gbala daxina igeni,
alo singbinna naxan sinma suben ma.
27 Xa n na a fala, n naxa,
‘N xa ɲinan n ma mawugan xɔn,
n yi n ma sunun lu na, n yi n sɔbɛ so,’
28 n gaxuma nɛn n ma tɔrɔn birin yɛɛ ra,
bayo n na a kolon
a i mi n yatɛ sɔntaren na,
29 n kolonma tinxintaren nan na i yɛɛ ra yi.
Nanfera n na n yɛtɛ xadanma fuuni?
30 Xa n na n maxa safunna ra,
xa n na n yiine raxa libin na,
31 i n nasinma nɛn lɔxɔn xɔrɛ ra,
n yi raɲaxu n ma dugine yɛtɛɛn ma.
32 Muxu mi a tan na alo n tan,
n mi nɔɛ a yabɛ,
hanma nxu siga kiti sadeni.
33 Tagi yitɔn muxu mi nxu tagi,
naxan nɔɛ a yiin sɛ nxu firinna birin ma‡ Tagi yitɔn muxuna fe mɔn sɛbɛxi Yuba 16.19-21 nun Yuba 19.25 kui.
34 naxan a dunganna bɛ n fari,
alogo a nɔrɔn nama fa n magaxu.
35 Nayi, n yi falan tima nɛn,
n mi gaxu a yɛɛ ra.
Koni n bata a kolon a n kedenna na a ra.”