2
Yunusa yi Ala maxandi
1 Alatala yi yɛxɛ gbeen nafa a yi Yunusa gerun. Yunusa yi lu yɛxɛ gbeen kui soge saxan, kɔɛ saxan. 2 Yunusa yi yɛxɛ gbeen kui waxatin naxan yi, a yi Alatala, a Ala maxandi.
3 A yi a fala, a naxa,
“N yi tɔrɔni waxatin naxan yi,
Alatala, n yi i maxandi,
i yi n yabi.
N to yi faxan dɛ,
n yi i xili,
i yi n xuiin namɛ.
4 I bata n woli baani tilinna ma.
N bata lu mɔrɔnne bun,* Igen mɔrɔnne: alo foyen na so igeni.
xunfanne birin danguma n fari.
5 N yi a falama nɛn, n naxa,
I bata n kedi i yɛtagi.
Koni, n mɔn i ya banxi sariɲanxin toma nɛn.
6 Igen bata te han n kɔɛna.
N bata lu tilinna ma.
Fɔxɔ igen sɛxɛne yi filin n xunna ma.
7 N bata yi godo igeni
han geyane bun.
Bɔxɔn bata yi raxutu n ma
han habadan.
Koni i tan Alatala, n ma Ala,
i bata n kɛndɛn ba faxan dɛ.”
8 “N niin ba waxatini,
n yi n miri i tan Alatala ma,
n ma maxandi xuiin yi sa i li i ya banxi sariɲanxini.
9 Naxanye suxurene batuma fuyan
ne e makuyama hinanna nan na.
10 N tan saraxane bama i xa nɛn,
n yi barikan bira i xa bɛtini.
N dɛ xuiin naxanye tongoxi,
n yi ne liga.
Alatala, i tan nan kisin kanna ra.”
11 Alatala yi yɛxɛn yamari alogo a xa sa Yunusa baxun xaren na.