66
Ba tang ko sorok nge ogmagaer
1 Gimed e girdi’ ni gubin, mu tolul niged e sorok u fithik’ e felfelan’ ngak Got!
2 Mu tang niged feni gilbugwan fithngan;
mu pininged e sorok ngak nge mus nga rogon!
3 Mu ga’ar gad ngak Got, “Rib thum’ feni manigil e pin’en ni ga ma rin’!
Gelngim e rib ga’,
pi to’ogor rom e yad be siro’ u fithik’ e marus u p’eowchem.
4 Urngin e girdi’ nu fayleng ni yad be liyor ngom;
yad be yon’ tangin e sorok ngom,
yad be tangnag e sorok nga fithngam.”
5 Mired ngam guyed e n’en ke rin’ Got;
pi maang’ang nike ngongliy u fithik’ e girdi’.
6 Ke thilyeg e day ke ngal’ ni but’ nib mlik’;
nge yan e pi chitamangidad kakrom riy u but’ nga barba’.
U rom e da felfelan’gad riy ko n’en ke rin’.
7 Be gagiyeg ndariy n’umngin nap’an nga gelngin nrib gel
ma be yaliy e pi nam.
Dariy reb e pi tatogopluw nra thag ni nge togopluw ngak.
8 Gubin e pi nam, mu pininged e sorok ngak e Got rodad;
mu pininged e sorok ngak ngan rung’ag.
9 Ke taydad ni ka gadad bafos,
ma dawori pagdad ngad parawgad.
10 Got, gur e kam sikeng nagmad;
ni bod e silber ni kan be’echnag ko nifiy,
aram rogon ni kam sikeng nagmad.
11 Kam pagmad kug awgad ko wup;
ma kam tay e gilab nib tomal nga daken keru’mad.
12 Kam pag e pi to’ogor romad ngar yot’yot’ed gamad;
gu warod u fithik’ e nifiy nge sugbur,
machane chiney e kam fekmad ko gin dabi buch ban’en romad riy.
13 Bay gu fek e maligach ni mo’oruf i yib ko naun rom;
bay gu pi’ ngom e n’en kug micheg.
14 Bay gu pi’ ngom e n’en ni kugog ni gu ra pi’
ko fa ngiyal’ ni gu bay u fithik’ e gafgow.
15 Bay gu pi’ e saf ni ngan urfiy u daken e altar;
bay gu maligach ko garbaw nge kaming,
ma ath riy e bay i taw ngalan nga lanelang.
16 Mired ngam motoyilgad, gimed urngin e pi’in gimed ma liyor ngak Got,
ma bay gog ngomed e tin ke rin’ ni fan ngog.
17 Gu yornag e ayuw ngak;
mu gu pining e sorok ngak ko pi tang.
18 Fa’anra mang e gu sabalbalyang ko pi denen rog,
ma dabi motoyil SOMOL ngog.
19 Machane, rriyul’ nike motoyil Got ngog;
ke rung’ag e meybil rog.
20 Gu be pining e sorok ngak Got,
ya de siyeg e meybil rog,
ara tel rog fare t’ufeg rok ni dabimus!
DRAFT VERSION — Proofreading in progress