148
Tharmiy nge but’ e nge pining e sorok ngak Got
1 Ngu’un pining e sorok ngak SOMOL!
Ngu’um pininged u tharmiy e sorok ngak SOMOL,
ni gimed e pi’in gimed be par u tharmiy nib tolang ngalang!
2 Gimed urngin e pi engel rok, mpininged e sorok ngak,
ni gimed urngin e yu raba’ i salthaw rok nu tharmiy.
3 Yal’ nge pul, mu piningew e sorok ngak;
gimed e pi t’uf ni be gal rama’med, mpininged e sorok ngak!
4 Pi tharmiy ni th’abi tolang ngalang, mu pining e sorok ngak,
nge gimed e ran ni gimed bay u daken lanelang!
5 Yad urngin ni ngu’ur pininged e sorok nga fithingan SOMOL!
Ya non, miyad sum;
6 i non me bagayad me yan i par nga tagil’ ni bay i par riy ndariy n’umngin nap’an,
ma dabiyag ni nge dab ra folgad.
7 Mu pininged e sorok ngak SOMOL u fayleng,
ni gimed e nig ni gang’ nge urngin yang u t’ay e regur;
8 nge uluch nge ayis nike el, nge ayis nib munguy nma mul u lang nga but’, nge pi manileng,
nge nifeng nib gel ni be fol ko thin rok!
9 Gimed e yungi ted nge pi burey, mu pininged e sorok ngak,
nge gimed e yu ke gek’iy nma yib wom’ngin nge gek’iy u fithik’ e garger;
10 nge gimed urngin e gamanman, ni tin ni mongmor nge tin malboch,
nge gamanman nma sirgig u daken e but’ i yan nge pi arche’!
11 Gimed e pi pilung nge girdi’en urngin e nam,
nge pi’in yad ma yog e thin nge urngin e pi’in yad ma gagiyeg, mu pininged e sorok ngak;
12 nge gimed e pagel nge rugod,
nge pi pilibthir ma ku er rogon e bitir!
13 Yad urngin ni ngar pininged e sorok nga fithingan SOMOL.
Fithingan e ir e th’abi ga’ u fithik’ urngin e ngachal;
ma feni sorok e ba tolang ko fayleng nge tharmiy!
14 I ir e be gagiyegnag e birok e nam be par nib gel,
ya nge urngin e tirok e girdi’ miyad pining e sorok ngak,
ni piyu Israel, nri yad ba t’uf rok!
Ngu’un pining e sorok ngak SOMOL!
DRAFT VERSION — Proofreading in progress