15
Wainɨn ikarɨzimɨn akar isɨn zuim
1 Ikiavɨra Itir God kamaghɨn na mɨgei:
2 “O nguazir kamɨn gumazim,
nɨ manmaghɨn nɨghnɨsi, wainɨn ikarɨzim, a ti derazir puvatɨ.
Wainɨn ikarɨzimɨn agharim, ruarir arɨzimɨn temebar agharibar tongɨn manmaghɨn deragh aghung,
dagh afiragham?
Ti puvatɨ.
3 Nɨ a isɨ bizitamɨn ingarigham, o?
Egh nɨ wainɨn ikarɨzir otevitam inigh, biziba guamin akezibar ingarigham, o?
Ti puvatɨgham.
4 An avim damuamin bizim a bar dera.
An ruaghatevimning isightɨ an arɨzim ganadam tong isightɨ, nɨ a isɨ an bizitamɨn ingarigham, o?
Ti puvatɨgham.
5 Avim tɨghar an isiam, ingangariba an puvatɨ.
Ezɨ datɨrɨghɨn avim tong an isightɨ,
a guizbangɨra ingangariba bar an puvatɨgham.”
6 Egha Ikiavɨra Itir Godɨn Ekiam kamaghɨn mɨgei, “Kamaghɨra, mati wainɨn ikarɨzir ruarir arɨzimɨn temebar tongɨn itim, a derazir puvatɨ. Kamaghɨn, kɨ dazimɨn mɨn anemɨsevezɨma, me a gaborozɨ a isi. Kamaghɨra, kɨ Jerusalemɨn itir gumazamiziba inigh pazavɨra me damigham, me mati avim arɨghamin daziba. 7 Kɨ men apanim damuva ivezir kuram me danɨngam. Me ti avim gitavɨraghsɨ damuva avegh bar isigham. Kɨ pazavɨra me damightɨma, me fogh suam, kɨrara, kɨ Ikiavɨra Itir God. 8 Me nɨghnɨzir gavgavim nan itir puvatɨ. Kamaghɨn amizɨ, kɨ nguazir kam damightɨ a danganir kɨnimɨn mɨn ikiam. Kɨ Ikiavɨra Itir Godɨn Ekiam kamaghɨn mɨkemegha gɨfa.”