1 Taunimanima iboudiai ese lohia bae matauraidia. Badina be siahu idoinai na Dirava ena amo e maimu; bona lohia iboudiai Dirava ese vada e haginidia. 2 Taunabunai, lohia e laoa ahumu tauna ese Dirava ena haheḡani e gwaua tubumu; bona e gwaua tubumu taudia ese davadia do bae abi. 3 Badina be kara namo tauna na lohia garina se garimu, a kara dika tauna hari. Oi o uramu lohia garina basio gari a? Kara namo ba kara, bena ia ese haine hanamomu; 4 ia na Dirava ena hesiai tauna, taunabunai baine hanamomu. A kara dika boma kara be ia garina boma gari; badina be ia ese dare se abia kavamu. Ia na Dirava ena hesiai tauna; kara dika tauna davana baine henia. 5 Taunabunai, ba matauraia: dia badu garina, a helalo dainai. 6 Una dainai umui ese tax monidia o henidiamu; badina be idia na Dirava ena hesiai taudia, nega idoinai ina ḡaukara e karaiamu. 7 Iboudiai na ena ḡau ena ḡau ba henidia: tax gogo tauna tax ba henia; heni-tao inarina tauna heni-tao ba henia; garina e garimu tauna ba gari henia; e matauraiamu tauna ba matauria.

8 Tau ta enai basio ima doa. Ba heura heheni; badina be bamona e ura heniamu tauna ese taravatu idoinai vada e badinaiamu. 9 “Basio heuda hanai” bona “basio ala ala” bona “basio henao” bona “basio hekisehekise” bona taravatu oredia iboudiai na ina haheḡani tamona lalonai vada e hebou: “Dekemu tauna ba lalokau henia, sibomu o helalokaumu na heto”. 10 Lalokau ese dekemu tauna se hadikaiamu; taunabunai lalokau na taravatu ihaḡuḡuruna.

11 Nega be dibamui: mahuta amo ba noga horana vada be kaumu. Badina be ta kamonai matama negana ai eda hahemauri na dauhai, a harihari ia na vada kahikahi. 12 Hanuaboi vada e ore, daba vada eme kahikahi; taunabunai dibura karadia baita nege, diari baita abia, eda kesi ai baita halaoa. 13 Eda kara nahuadia baita toho; eda raka na dina ai ta rakamu. Basita lebulebu; basita kekero; basita heuda hanai; basita mata dika; basita heai; basita vaḡeḡe. 14 Lohiabada Iesu Keriso ba hadokilaia, bona tau-animui edia ura dikadia basio abi dae.