12
1 I to mayè flinge i kngak kenen di gugsalaan mayè
gmadè,
bay i to là mayè flinge i kngak kenen di gugsalaan laan fulungfaldam.
2 Kanlehew Dwata i to fye,
bay i to falan fandam i sasè nimoan, nukum kenen Dwata.
3 I to sasè landè gutadagan du sasè nimoan, taman fugen,
bay i to matlu nun gutadagan du fye nimoan, taman là kenen fugen.
4 Lehew na dag i satu lagi i yaanan fye ldam,
bay ku nun libun gafyà i yaanan,
salngad kenen i satu tduk di dad tulan i yaanan na gafalmo kenen.
5 I fandam i to matlu gablà di demen to too tlu,
bay i to sasè malak i demen to fagu di kafgawan.
6 I talù i dad to sasè gafalmo i demen to,
bay i talù i dad to matlu gafalwà i dad to fanla falmo.
7 I dad to sasè mati, na landè tnagakla bella,
bay i dad bel i dad to matlu, landè gusenla.
8 I to fulung faldam magdayen,
bay i to là matlu fandaman mgadoy.
9 Fye fa i to mdanà ku too malgad mimò du fye mto,
di to baling tatì flingu kenen bong to, bay mnè kenen di kbitil.
10 I to matlu, too fye kifatan i dad lmanafan,
bay i to sasè, too sasè kiboan i dad lmanafan.
11 I to too malgad mimò fule nun lukas i knaanan,
bay i to mlalò i dad nimò landè gukmamu, landè kaglabatan.
12 I dad to sasè, én alò kayèla nimò i sasè,
bay i dad to matlu, là mgili i kimòla fye.
13 I to sasè mfawel kenen fagu di sasè taluan,
bay i to matlu galwà di ksamuk.
14 I to gamdawat i untung fagu di dad gmanan na i dadmgimoan.
15 I to là fulung faldam, fnaglutan slame fye i kdeenimoan,
bay i to fulung faldam too flinge i fngewe.
16 I to là fulung faldam, laan gadnan i kaflabean,
bay i to nun kaglabat, fbayaan i kafyà kenen.
17 I to tmulen i kaglut di gususay falwaan i kaglut,
bay i to tmulen i là glut falwaan i kakakéng.
18 I to i là funa fandam i manan,
i manan gamban salngad i kagban i fais,
bay i to fulung faldam, i manan salngad i bulung dugafgulê.
19 I kakakéng là sa mlawil du nun gusenan,
bay i kaglut mlawil landè gusenan.
20 I to faldam mimò sasè, klimbung i mnè di nawan,
bay i to faldam mimò fye, klehew i mnè di nawan.
21 Landè sasè mkel di to matlu,
bay i to sasè gal nkel i samuk.
22 Too knang Dwata i dad to tmulen kakakéng,
bay toon kanlehew i dad to tmulen i kaglut na dmohò i manla.
23 I to fulung mebe i kton laan fdag i gnadean,
bay i to là fulung faldam balingan fdilè i klandè gnadean fagu ditaluan.
24 I to malgad mimò, kenen mbaling to mebe i nimò,
bay i to là mayè mimò, landè fye kel di kenen, bay mimò fagu dileges.
25 I to gal nun ksamuk i nawan landè klehewan,
bay fagu di too fye talù i demen to, mbaling matgal i nawan.
26 I to matlu, kenen malak i dad demen sgalak di fye,
bay i dalan i to sasè gafasyat dale.
27 I to là mayè mimò, laan gwè i knayean,
bay i to malgad mimò, nun kafye gwean.
28 I matlu dalan salu di klawil,
bay i bigkò dalan salu di fati.