16
1 Fakay sa di to ku funan fandam i fanan nimò,
bay mdà sa di knayè Dwata ku dnohoan ku là.
2 Kdee nimò i to fandaman too fye,
bay Dwata i mukum i knayè nawa i to, na i duenan mimò dun.
3 Saligam di Dwata i kdee nimoam,
na i kdee fandamam nimò, du fye gdohò.
4 Nun tafandam Dwata gufkelan i kdee mgimoan,
na balù i dad to sasè nun gukella dunan i kalmola.
5 Too knang Dwata i kdee dad to fdatah,
na i kaglutan, toon ale fanlayam.
6 Ku ge satu to too gsalig Dwata, na nun kakdom kenen, nlifetan isalaam,
na ku nun klikoam di Dwata niwasam i sasè.
7 Di kimò i to i nimò gaflehew Dwata,
én i smafye kenen di dad to balù dad dmuen kenen.
8 Fye fa ku tukay knunam, syan fagu di matlu i kagweam dun,
di bong knunam, bay gweam fagu di klimbung.
9 I to fakay faldam ku tan i fanan nimò,
bay Dwata alò fakay malak kenen di kimoan dun.
10 I glal i harì mdà di Dwata,
taman i kukuman mbaling matlu.
11 Ani kayè Dwata di dad to fabli, ku là mlimbung i timbangla,
na too matlu i kafablila.
12 Knang i dad harì i sasè nimò,
du én gutadag i kagotla i matlu nimò.
13 I dad harì mayè ale flinge i kaglut,
na knabasla i to tmulen i kaglut.
14 I to fulung faldam, too fgal flehew i harì,
du ku malbut i harì ken nun fafatin.
15 Kabay ku lehew i harì, mlé kenen i kafye di dad to gaflehewkenen,
salngad i ulen mlé fye di dad fule.
16 Fye fa ku nun kfulungam faldam di nun blawenam,
na fye fa ku nun kaglabatam di nun salafiam.
17 I to fye mlalò i dalan mawag di ksasè,
na i to too fgeye ku tanè i gusalun, landè gaslokan.
18 I bunge i kafdatah na kafdag dunan kalmo.
19 Fye fa i to ku fdanaan i nawan na fadlug di klandean,
di gakuf kenen di dad to fdatah na nun alelan di dad tnakula.
20 I to too flinge i tdò kenen, nun gufyen,
na nun kafye di to too smalig di Dwata.
21 I to fulung faldam dnagit to nun kaglabat,
na i kafye taluan, én gmagan mebe i dad to.
22 I kfulung i to fulung faldam, én gafye na gatgal i nawan,
bay i to là fulung faldam, landè gukmamu i katdò kenen.
23 I to fulung faldam, too funa faldam di laan fa talù,
taman i taluan too fnaglut i demen to.
24 I fye talù, salngad i tnab too mi i neman,
na gafye i laweh.
25 Nun dalan fandam i to too matlu,
bay i gusen i dalan ani di fati.
26 I to mimò mdà di kbitilan too fgal mimò,
du kayean gamkaan.
27 I to sasè i landè gukmamu, galan neye i dalan kiboan fsasè idemen to,
na i taluan too gafalmo, gambet i lifoh.
28 I to sasè, gal mbel i kastulen,
na i kalsalékan gamgimò samuk na samkah i dad to sgalak.
29 I to labè, mgaw i demen sgalak,
na malak kenen di sasè dalan.
30 Fgeye ge i dad to flingu fye, fagu di kibòla meye di ge,
du én dalanla fan mimò sasè.
31 I klawil, én untung i to matlu i nimoan,
na i uben di wakan i gumgafean.
32 Fye fa i to là mlal malbut di to nun bong enegan,
na fye fa i to gmagan damnan i kton di to magot i syudad.
33 Fakay dee nimò i dad to, du fye gadèla knayè Dwata,
bay Dwata alò fakay dmohò i gukelan.