18
1 I to ku én alò fandaman gufye i kenen kto,
laan magin di balù tan i fye fandam i dademe.
2 I to là fulung faldam, laan mayè gamlabat,
bay aloan kayè fdag i gnadean.
3 Ku gamsalà i satu to, nun knang na kadoy kenen,
na ku malmo dengeg i satu to, alò kyà samnagin kenen.
4 I dad gman i to fulung faldam gumwè i dademe kfulungla,
na too mngalam gambet i mahin, na too fye gambet kaloh i yéél.
5 Là sa fye ku i to gal mukum msen di to nun salà,
na là fakay ku laan banlé kagalwà i to landè salà.
6 I talù i to là fulung faldam, én gutambù i ksugak,
na tatian mimò i tdukan.
7 I gafalmo i to là fulung faldam, dunan i dad galan gman,
na mfawel sa mdà di kenen dad talù.
8 I kastugad salék too kanbayan fanlinge i dad to,
di dale salngad knaan too fye i neman na too fye nawala mlo dun.
9 I to malwe mimò, salngad ksasè i to gal falmo.
10 Dwata salngad i bong mgal gumnè
i gal gumila i dad to matlu, du fye giwas ale di sasè.
11 I dad to nun knun, fandamla i knunla kamlung dale,
salngad kaklung i bong mdatah labat batu glibut i syudad.
12 I to fdatah, falmon i kton,
bay i to fdanaan i kton, too mgafè.
13 I to là funa flinge klon tmimel,
kenen i to là fulung faldam na nimoan i gumyaan.
14 I to fangalan i nawan di bang i nun fdasan, ani i dalanantmabeng i kton, du fye mto,
bay i to flungay i nawan di nun fdasan, landè imen nawan ku mto fakenen.
15 I to nun kaglabat too mayè ku matnù i gnadean,
na i to fulung faldam too flinge, du fye matnù i gnadean.
16 Ku mayè ge smite i satu bong to,
mebe ge i blém kenen, fye mlal site.
17 I to muna talù di usay, fnaglutam glut i gmanan
di là fa snalek i to demen susay.
18 Ku nun lwe mdatah to i masbalà di usay,
na malima musay, fakay sulat i dagitla na kanligong,
na simto dagit i muna lamwà, kenen mgalék i nun kaglut, na anigmagan musay dale.
19 I flanekam tafatdukam i nawan, too malima samfulê di fye i nawange,
na ku nugakam fa, én too gablabal di kasafyeyu.
20 Ku tan gukel i kdee man i satu to,
alò kenen sa tmimel dun.
21 I dad gman i satu to, én gafalwà i kton ku demen gafalmo i kton,
taman là fakay ku laan tnimel ku tan gukel i dad manan.
22 I lagi ku tamite i fye yaan, teenan i kafye,
du i kafye teenan tablé Dwata di kenen.
23 Ku talù i to landè, too kenen fakdo talù,
bay ku talù i to nun knun, too gamban i taluan.
24 Nun dad dademe sgalak alò flingu nun kakdola,
bay nun to samgalak i too kamdo i demen sgalak, mdatah fa di tooflanekan.