Salmo 80
80
I dasal satu to mni ku fasfulê Dwata i dad ton, i bel Israél, di ifatan
Ani satu lingag Asaf.
1 E ge i Mifat Dad Bel Israél,
i malak dad to Dyosif gambet i kalak satu mifat dad bilibilin,
begam gami fanlinge.
Ge i sudeng di gusudeng i mdatah harì di tah i dad kafbaweh dad sérubim,* Dad sérubim dunan i dad mebe i gusudeng Dwata di langit di tah i fafakla. Nun mgimò gambet i kafbaweh lwe Sérubim déén di tah i kaban blawen gugkah i dad batu gusmulat dad flalò Dwata déén di lam i too Mdatah Sibay di Bong Gumnè Dwata. Déén gumnè Dwata di blengla di klon mnè di tah tanà ani. Fitela i bong kdatah na ktulus Dwata.
fitem i kdataham na i bong knengam.
2 Fitem i bong enegam di dad bel Ifraim, Bénhamin, na Manasas,
na begam gami falwà di kaflayam nagumi.
3 E Dwata, fasfuléam gami di ifatam;
fitem i kakdom di gami lêman du fye galwà gami.
4 E Amumi Dwata, gumdatah i kdee di tah langit na tanà,
kel di kilen fa i kalbutam gami dad tom,
na laam fanlinge i dad dasalmi?
5 Gambet én knaan blém gami i lwakmi,
na too fnò i tabù i lwak finumam gami mdà di klidù nawami.
6 Mdà di kalbutam gami nadoy gami i dad to di dad masadfél banwe,
na dad dmuen gami tì ale sulé gablà di gami.
7 E Dwata, gumdatah i kdee di tah langit na tanà, fasfuléam gami di ifatam,
fitem i kakdom di gami lêman du fye galwà gami.
8 Tansoam gami gambet i walad grép mdà di banwe Idyif,
na tafalwaam i dademe to mdà di dad banwela, du én gufneam gami,
salngad di kfulem walad grép di tanàla.
9 Salngad tanlanebam i gumulem walad,
na taman too fye kdalil i fulem na kmawal di klamang tanà.
10 I dad bulul tamgalung i walad,
na i dad fanga i walad, nlimunla i dad malbang kayu sidar.
11 I dad fangan gafat ditù di mahin Méditéranyu, na i tubadan kel di yéél Yufratis.
Salngad én i knèmi na kbelmi, gami dad tom, di banwe gufneam gami.
12 Kabay di bang ani salngad ku talanbaam i labat glibut di fulem, du talaam gami nan nifat.
Kayeam kè ku i kdee magu mlius mifò i bunge grépam?
13 I dad to dmuen, fansasèla na falmola gami salngad di sdè di bnas samdà i fule grép,
na i kdee lmanaf di bnas kmaan dun.
14-15 E Dwata, gumdatah i kdee di tah langit na tanà, beg ge samfulê di gami;
lanngalungam gami mdà di langit na neyem i kagkahmi,
na fandufam gami i waladam grép tafule i kwananam,
i salngad tingà too mgifat.
16 I kibò dad to dmuen gami salngad ku natela i walad grép fulem na snakufla di lifoh.
Fye ku falmom ale fagu di kafablatam i baweham di dale.
17 Kabay kanlungam i dad to tamgalékam du nfunam,
i toom falnok fye too ale mgal.
18 Ku ani nimoam là gami lêman kmagol ge:
tangalam gami lêman, na dmayen gami ge.
19 Amumi Dwata, gumdatah i kdee di tah langit na tanà, fasfuléam gami di ifatam.
Léam fite i kakdom di gami du fye galwà gami.
*80:1 Dad sérubim dunan i dad mebe i gusudeng Dwata di langit di tah i fafakla. Nun mgimò gambet i kafbaweh lwe Sérubim déén di tah i kaban blawen gugkah i dad batu gusmulat dad flalò Dwata déén di lam i too Mdatah Sibay di Bong Gumnè Dwata. Déén gumnè Dwata di blengla di klon mnè di tah tanà ani. Fitela i bong kdatah na ktulus Dwata.