Salmo 110
110
Fdatah Amuito Dwata i harì mgalékan
1 Man i Amuito Dwata di Amugu, manan,
“Fagotgu ge i kdee, taman sudeng ge dini gsen di kwanangu;
kel di kagfisangu dad dmuen ge,
na i kafkahgu dale di dungan i falel bliam.”
2 Amugu, mdà di banwe Sion, falbong Amuta Dwata i nagotam, na manan,
“Nagotam nan i dad mnang nawa ge.
3 Na di duh kasfatim i dad dmuen ge,
i dad tom, too ale mayè tmabeng ge di kasfati;
i ksalu i dad lamnok lagi déén di ge di bulul gumneam
salngad di alù msut di too flafus.”
4 Tamakang i Amuta Dwata,
na laan nawì i fakangan, gmanan,
“Tanalékta ge du mbaling bà i dad togu di deg kel di landè sen,
salngad di ku Harì Mélkisidék, i bà di deg di muna na dad tmadol kenen.”
5 Na balù tan i nimoam, déén i Amuta Dwata gsen di kwananam;
na toon fnisan i dad harì dmuen ge di duh i sè kalbutan.
6 Nukuman i dad to di dad sahal banwe,
na too dee i dad to fnatin di kfisanan i dad harì di klamang banwe.
7 Na kafnge én, minum i harì di yéél di kilil i dalan,
na kanto nun galan, tadag kenen du tamatu kenen di kasfati.