Salmo 126
126
I klehew dad to di Sion, dunan Dyérusalém, di kasfulê Dwata dale ditù
Ani satu lingag dad to salu di Bong Gumnè Amuito Dwata.
1 Di kebe i Amuito Dwata gito samfulê di banwe Sion,
gambet kamna ito i kafyen,
2 du tay i bong kuléito, na mkit ito di bong klehew!
Na gman i dad to di dademe banwe, “Too gamtikeng i bong kafye mgimò i Amula Dwata di dale.”
3 Na too glut, gamtikeng sa i mgimò Dwata di gito,
na too ito lehew!
4 Taman mni gami di ge, Amumi Dwata, ku fasfuléam gami di fye knèmi di muna,
gambet i kfuléam i bong yéél di dad kafag sbang di banwe Négéb di kfulenam dun.
5 I dad to mngel di kaflala bnê,
too mkit di klehewla kadang di kaktula!
6 Hae, i dad to mngel di kebela i bnê di gumlala,
mkit di klehewla kadang di kebela mulê i ulê di bang kaktula.