Salmo 139
139
Amuito Dwata gmadè kdee
Ani satu lingag Dabid.
1 Amugu Dwata, tatoom agu neye,
na gadeam i kdee gablà di deg!
2 Gadeam i kdee nimògu, ku sudeng agu ku demen tadag;
gadeam kdee fandamgu balù too ge mawag.
3 Fandamam ku nè gusalugu na ku nè gumilègu,
na gadeam i kdee tagusalugu na kdee gnagugu.
4 Amugu Dwata, balù ku làgu fa gman dun,
tagneam gadè ku tan i mangu.
5 Balù nè gumeyegu, déén ge, balù di munagu demen di kagolgu;
na snafangam agu i kmalam.
6 I ksikof gnadeam too gamtikeng di deg;
too mdatah i kgadeam na landè kibògu gamlabat i kdatahan.
7 Nun kè gusalugu i là ge déén, ge i mnè di balù nean?
Nun kè gusalbunigu gawag di ge?
8 Landè, du ku salu agu ditù di langit, ditù ge!
Ku baling agu milè di lam banwe i dad to mati, lê ge ditù!
9 Ku nun kibògu mayeng, na mayeng agu salu di sen tù i gusut i duh,
ku demen mnè agu di faltù i bong mahin di too gumawagan gsen di gusdaf i duh,
10 balù ditù, ge i malak deg,
na ge i tmabeng deg.
11 Ku kayègu salbuni di too gukmifun,
na balù i kalbong kalwa tì mbaling kifu,
12 knean mite ge sa Dwata, du i kifu là sa kifu di ge,
i butang salngad kalwan di bong kalwa di mduh;
i kifu na kalwa salngad di ge.
I Amuito Dwata i mlé na mwè i nawa
13 Ge sa i mimò i kdee di nawagu na lawehgu ani;
ge i tmibuk deg déén di tien i yêgu.
14 Dnayenta ge du too gamtikeng i kimoam deg, na too tì fye.
I kdee nimoam too gamtikeng i kafyela!
Too sikof i kgadeam deg;
15 hae, di kimò i lawehgu di gugbunin di lam tien i yêgu,
di too fye kastugad i dad tulangu, là gbuni di ge.
16 Tateenam agu déén di kamlità agu fa;
tagsulatam di librum i gufsen i dad butanggu mto;
i kdee butang alelam deg, tagsulatam di là agu fa mto.
17 E Dwata, too mabtas i kdee fandamam gablà di deg,
na too tì dee i fandamam.
18 Nsegu na too ale dee fa di dad falak,
kafngegu mse, déén agu fa di safédam.* Satu kubad ani dunan: na ku tamukat agu déén agu fa di safédam.
19 E Dwata, fye moon ku fnatim i dad to sasè,
na fye moon ku talà agu nan snamuk i dad to mayè mati to.
20 I dad to én, talù ale sasè gablà di ge,
na falmola i dagitam.
21 E Amugu Dwata, toogu mnang nawa i dad to mnang nawa ge;
too mdà di nawagu mnang nawa i dad to dmuen ge.
22 Too sikof i knanggu dale,
na di fandamgu, lê gami sduen.
23 E Dwata, toom neye i nawagu ani, du fye toom agu gadè;
tnandakam agu, fye gadeam i kdee mnè di fandamgu.
24 Neyem ku nun sasè dini di deg i gaflidù ge,
na nalakam agu, Dwata, di dalanam landè gusenan.