11
Den tu kotoigi
1 Baka dati mi kisi wan tiki san ben gersi wan doitiki. Dan den taigi mi taki: “Opo go marki a Santa Presi nanga a altari, èn teri den sma di de na ini a Santa Presi e anbegi Gado. * Ezec 40:3; Zach 2:1-2 2 Ma yu no mus marki a opo presi na dorosei fu a Santa Presi, bika a pisi dati na gi den sma di no sabi Gado. Fotenti-na-tu (42) mun langa den o rigeri na ini a santa foto. * Luk 21:24 3 Mi o taigi den tu kotoigi fu Mi fu weri rowkrosi èn fu taki san Mi o gi den fu taki wan dusun tu hondro nanga siksitenti (1.260) dei langa.” 4 Den tu kotoigi na den tu oleifbon nanga den tu kandratiki san tnapu na fesi Masra di abi grontapu. * Zach 4:3,11-14 5 Efu wan sma wani du den ogri, dan faya o kmopo na ini den mofo, kiri den feyanti fu den. Na so den sma o dede di wani du den ogri. 6 Ini a heri pisten san den o taki san Gado gi den fu taki, den man disi o abi a makti fu tapu a alen fu a no fadon. Den o abi a makti tu fu kenki a watra tron brudu, èn fu meki ala sortu ogri kon na grontapu. Den sani disi den o man du te den wani. * 1Kon 17:1; Ex 7:17-20
7 Dan te den kba kotoigi, a krasi meti san e kmopo ini a olo san no abi gron sa feti nanga den. A sa wini den, èn a sa kiri den. * Dan 7:7,21; Kon na Krin 13:5-7; 17:8 8 A dedeskin fu den o tan didon na tapu a strati fu a bigi foto. Yeyefasi den e kari a foto disi: Sodom nanga Egipte. Na ini a foto disi den ben spikri a Masra fu den na a kroisi. * Jes 1:9-10 9 Dan sma fu ala folku nanga lo, èn fu ibri tongo nanga kondre, o si fa den dedeskin e tan didon drape dri nanga afu dei langa. Den no o wani meki den dedeskin disi beri. 10 Den sma di e libi na grontapu o breiti nanga a dede fu den, èn den o prisiri. Den o seni kado gi densrefi, bika den tu profeiti disi ben pina den sma di e libi na grontapu.
11 Ma baka den dri nanga afu dei, Gado gi den tu kotoigi libi baka. Den opo tnapu, èn ala sma di si den bigin frede srefsrefi. * Ezec 37:10 12 Dan den yere wan tranga sten taki kmopo fu heimel taki: “Un kon dya na loktu!” Ne den tu kotoigi opo go na heimel ini wan wolku, èn den feyanti fu den ben luku den. * 2Kon 2:11 13 Dan tapu a srefi momenti dati, a gron bigin seki bun hebi. Efu yu e prati a foto ini tin pisi, dan wan fu den tin pisi broko fadon. Seibi dusun sma dede. Den tra sma di tan na libi ben kon frede srefsrefi èn den gi a Gado fu heimel grani. * Kon na Krin 6:12; 16:18
14 A di fu tu ogri psa. Luku, a di fu dri e kon her'esi!
A di fu seibi tutu
15 Di a di fu seibi engel bro na tapu en tutu, dan tranga sten taki kmopo fu heimel. Den taki:
A Masra fu unu,
nanga a Wan
di A poti fu tron Kownu,
kon rigeri now
na grontapu leki Kownu.
Na En sa rigeri
fu têgo èn ala ten. * Dan 2:44; 7:14,27
16 Dan den tutenti-na-fo (24) fesiman di sidon na fesi Gado na tapu den kownusturu, trowe densrefi langalanga na gron. Den anbegi Gado 17 taki:
Masra Gado di abi Ala Makti,
Yu di de, èn di ben de,
wi e taki Yu tangi,
fu di Yu teki Yu bigi makti
dan Yu bigin rigeri leki kownu.
18 Den folku ati ben bron.
Ma Yu ati e bron,
èn a ten doro
fu krutu den sma di dede.
A ten doro fu gi paiman
na den profeiti
di ben wroko gi Yu,
nanga den sma fu Yu,
nanga den sma
di abi lespeki gi Yu,
pikinwan nanga bigiwan.
A ten doro tu
fu figi den sma puru
di e pori grontapu. * Ps 2:5; 110:5; 115:13
19 Dan den opo a Santa Presi fu Gado na ini heimel èn a santa kisi fu a ferbontu ben kon fu si drape. Ne faya bigin koti èn mi yere wan lo sten. Dondru bari, grontapu seki, èn furu tranga pis'pisi-ijs fadon na grontapu. * Kon na Krin 8:5; 16:18,21
*11:1 Ezec 40:3; Zach 2:1-2
*11:2 Luk 21:24
*11:4 Zach 4:3,11-14
*11:6 1Kon 17:1; Ex 7:17-20
*11:7 Dan 7:7,21; Kon na Krin 13:5-7; 17:8
*11:8 Jes 1:9-10
*11:11 Ezec 37:10
*11:12 2Kon 2:11
*11:13 Kon na Krin 6:12; 16:18
*11:15 Dan 2:44; 7:14,27
*11:18 Ps 2:5; 110:5; 115:13
*11:19 Kon na Krin 8:5; 16:18,21