Song 129
Ol Israel i beten long God i ken bagarapim ol birua bilong ol
Song bilong ol lain i wokabaut i go long ples bilong lotu.
1 Israel, yu stori long mipela
long ol birua
i bin wok long mekim nogut tru
long yu,
long taim yu yangpela yet
i kam inap long nau.
2 Yu tok olsem, “Ol birua i bin wok
long mekim nogut tru long mi
long taim mi yangpela yet
i kam inap nau.
Tasol ol i no winim mi.
3 “Ol i wipim mi nogut
na wip i katim skin
long baksait bilong mi.
Ol i mekim planti longpela sua
i kamap
olsem ol baret long gaden.
4 “Tasol Bikpela i stretpela olgeta,
na em i bin helpim mi
na kisim mi bek
long han bilong ol man nogut,
na mi no moa i stap
wokboi nating.”
5 Mi laik bai mipela i winim ol man
i save birua long Saion,
na ranim ol i go bek
long ples bilong ol.
6 Mobeta ol i stap
olsem gras i save kamap
long het bilong ol haus.
Ol i no katim dispela gras yet,
na em i drai kwiktaim.
7 I no gat wanpela man
i save bungim dispela gras,
na pasim mekpas na karim i go.
8 Na ol manmeri i wokabaut i go
klostu long ol,
bai ol i no inap tok olsem,
“Bikpela i ken mekim gut
long yupela.
Long nem bilong Bikpela,
mipela i givim blesing
long yupela.”