4
Bajari Kena Nunda Sonembadae Benunu Saore!
1 Arie God, nanda sorega kato, na nimokena benunu sarena, ningi!
Na dara jokáda tereteno, nine sonembusesi.
Oroko eminda nandae joka edo nanda banungari ningi!
2 Ne ghousa mavega ava nanda binodae
bengoso arevu?
Ne ghousa mavega ava god beká irae dubo ruruse, amboda amboda arevu?
3 Kasama evu, evetu genembo eveva ava,
Bajari nunda tofodae sedo gategusira.
Ava sedo na numokena kori seraena amo, nu ningiraira.
4 Erá janje ekoghae irise, aimi ari ekoko eose!
Aindae ninda avari vasada fase irise nanda geka evia durumugedo kote gogoghombe!
5 Bajari da joba beká ava mutaresa.
Aminguse, ninda tumondari numokena fitaresa.
6 Natofo digari benunu seraera,
“Arie, Bajari, ninda esimbugari mokogo namanekena bofu!
Arie, Bajari, ninda kavevera aimi, namane fuge garesa.”
7 Avata, ivuga nine nandae futusesa amo, teriagori.
O ne faravada vuji a asi vaini da muká bambudo kirumo use, ivuga eraera amo, jo amingo iraeri.
8 Arie, Bajari, na nanjigo fasarena, dubo jamaghae avarena.
Ai resira amo, nisuka, nine na kaifa tavo eraesa.