21
Babylon Soah Laitloeknah
1 Tuithim ah khosoek lamloh cangpalam bangla tinghil tih,
khohmuen lamloh a rhih om neh aka pawk,
tuipuei khosoek kah olrhuh.
2 Kai taengah mangthui neh mangkhak la ha puen.
Hnukpoh long tah hnukpoh coeng tih
rhoelrhak long khaw rhoelrhak coeng.
Elam te paan laeh, Madai te dum laeh.
A hueinah boeih te ka duem sak ni.
3 Te dongah ka cinghen he tloh kah
a thueknah khaw cung coeng.
Ca om vaengkah a tloh bangla kai n'tuuk.
Ka yaak nen khaw ka paihaeh tih
ka hmuh nawn khaw ka let coeng.
4 Tuennah loh kai n'let sak tih
ka thinko ah kho a hmang.
Ka huengaihnah hlaemhmah te
kai ham tah thuennah la poeh.
5 Caboei te a tloeng.
Tlak te doh saeh, mangpa rhoek te ca saeh,
o saeh lamtah thoo saeh. photling te koelh saeh.
6 Te dongah Boeipa loh kai taengah,
“Cet laeh, rhaltawt te pai saeh lamtah
a hmuh te ha puen saeh,” a ti.
7 Leng, marhang caem tarhoi, laak leng,
kalauk leng a hmuh vaengah
a hnatungnah a yet neh
a hnatungnah te hnatung saeh.
8 Te phoeiah rhaltoengim kah sathueng loh,
“Ka boeipa, kai khothaih puet ka pai tih
ka mueitung dongah khoyin puet ka pai bal.
9 Olp 14.8; 18.2Tedae marhang caem tarhoi kah hlang te
leng neh ha pawk coeng he,” tila pang.
Te phoeiah a doo tih, “Cungku coeng,
Babylon neh a pathen mueidaep tah
boeih cungku coeng tih
diklai dongah phaeng rhek coeng.
10 Ka cangtil neh ka cangtilhmuen kah ka ca taengah
Israel Pathen caempuei BOEIPA taeng lamkah
ka yaak te ni nangmih taengah ka puen.
Dumah Ham Olrhuh
11 Seir lamloh kai aka khue Dumah olrhuh loh,
“Khoyin kah aka tawt khaw melae?
khoyin kah aka tawt khaw balae? a ti.
12 Aka tawt loh,
“Mincang halo tih hlaemmuei ah na yam khaw na yam vetih
na lo khaw na lo uh aih sue,” a ti.
Arabia Ham Olrhuh
13 Arabia ham olrhuh,
Arabia duup ah naka rhaeh Dedanim lambong rhoek.
14 Tuihalh doe ham te
Tema kho kah khosa rhoek loh tui hang khuen saeh,
amah buh neh aka doe rhoek khaw yong coeng.
15 cunghang taeng lamloh,
cunghang aka bong mikhmuh lamloh,
lii aka phu kah mikhmuh lamloh,
caemtloek hnorhih kah mikhmuh lamloh yong uh.
16 Te dongah Boeipa loh kai taengah, “Kum khat khuiah kutloh kum kah bangla om vetih Kedar kah a thangpomnah khaw boeih bawt ni. 17 Kedar ca khuikah hlangrhalh lii pom te amah tarhing ah aka sueng khaw Israel Pathen Yahovah loh a thui coeng dongah polpai uh ni,” a ti.