طٜرٜوٛلْ نغٛلْ طُمْ وِنْدَنِ
اِبْرَانِيَنْکٛعٜنْ
حَبَرُ دٛوْ طٜرٜوٛلْ نغٛلْ
وَلَا تَبِّتِنْطٛ مٛيٜ وِنْدِ طٜرٜوٛلْ نغٛعٛلْ؞ نغٛلْ وِنْدَ دُوٻِ 70 غَطَ دَݧْنغٛلْ يٜىٰسُ؞ طُمْ وِنْدَنْغٛلْ وٛنْغَلْ کَوْتَلْ تٛکُّٻٜ يٜىٰسُ نَتُّٻٜ تٛرَّاجِ فٜىٰرٜ‑فٜىٰرٜ؞ تٛرَّاجِ مَٻّٜ اٜ ٻٜيْدٛو؞ بِنْدُطٛ طٜرٜوٛلْ نغٛلْ سٜمْبِطِنِيٻٜ دٛوْ تٛکُّکِ يٜىٰسُ؞ اٛ حٛلِّيٻٜ يٜىٰسُ اَلْمَسِيحُ وٛنِ کِسْنٛووٛ مٛ اَللَّه لِلٛيِ؞ اٛ حٛلِّيٻٜ فِي تَتُمْ: اَرَنْدٜ اٛ حٛلِّيٻٜ وِيکِ يٜىٰسُ اٛ ٻِطّٛ اَللَّه؞ ندٜ يٜىٰسُ وٛنِ ٻِطّٛ اَللَّه، اٛ ٻُرِي اَنَّبٛعٜنْ، اٜ مَلَاعِکَعٜنْ، اٜ اَنَّبِ مُوسَ؞ طِطَٻُمْ وٛنِ اَللَّه وَرْتِرِي يٜىٰسُ اَرْدِيطٛ دِينَ مٛ حَا اَبَدَا، ٻُرْطٛ اَرْدِيٻٜ دِينَ اَرَنْدٜعٜنْ؞ تَتَٻُمْ بَرْکَ يٜىٰسُ کٛولِيٻٜمٛ کِسِي دَغَ حَکّٜ مَٻّٜ، ٻٜ بٛو کِسِي دَغَ کُلٛلْ اٜ مَيْدٜ؞ حِرْسُکِ مَرْلٜ کِ يَحُودَنْکٛعٜنْ نغَطَيْنٛو نغَمْ سَکَّنْکِ اَللَّه وٛنِ مِسَالُ نٛ يٜىٰسُ وَرْتِرِ شَکِّرِ نغَمْ حَکّٜ مٜىٰطٜنْ حَا اَبَدَا؞
1
اَللَّه مٜتِرِي ٻِطّٛ مُوطُمْ
1 ندٜنّٛ اَللَّه مٜتَنِي مَامَعٜنْ مٜىٰطٜنْ ندٜ طُطُّمْ اٜ طَتٜ طُطّٜ دَغَ کٛنْدُطٜ اَنَّبٛعٜنْ؞ 2 اَمَّا ندٜرْ بَلْطٜ طٜعٜ طٜ رٜعُکِ دُونِيَارُ اٛ مٜتِرَنِيعٜنْ ٻِطّٛ مَاکٛ، مٛ اٛ سُٻِ وَرْتَ دٛنٛووٛ کٛو طُمٜ؞ طٛنْمَا بَرْکَ مَاکٛ اَللَّه تَغِ دُونِيَارُ؞ 3 اٜ مٛ حٛلَّ جَيْنغٛلْ تٜدُّنغَلْ اَللَّه، ندٜنْ ندٜرْ کٛو طُمٜ اٜ مٛ نَنْدِ اٜ اَللَّه؞ اٜ مٛ جٛغٛرِي کٛو طُمٜ وٛلْدٜ مَاکٛ غٛودُندٜ بَوْطٜ؞ غَطَ اٛ وَطِي لَاوٛلْ يَافَاکِ حَکّٜ، اٛ جٛوطِي تٛنْ دٛوْ تٛ جُنْغٛ ݧَامٛ نغٛ اَللَّه جٛومُ مَنْغُ؞
نٛ يٜىٰسُ ٻُرْدِ مَلَاعِکَعٜنْ
4 اَللَّه حٛکِّي ٻِطّٛ مُوطُمْ لَامُ ٻُرْطُمْ طُمْ مَلَاعِکَعٜنْ، نٛنْ نٛ اِنْدٜ ندٜ اَللَّه حٛکِّمٛ ندٜ ٻُرِي اِنْطٜ مَٻّٜ؞ 5 نغَمْ اَللَّه مٜىٰطَايِ وِيکِ غٛطّٛ مَلَاعِکَاجٛ،
«اَنْ، اَ ٻِطّٛ اَمْ،
حَنْدٜ مِ وَرْتِي ݧَاکٛ مَاطَ؞»
طٛنْمَا اَللَّه مٜىٰطَايِ مٜتِ دٛوْ غٛطّٛ مَلَاعِکَاجٛ وِعِ،
«مِ وَرْتَيْ ݧَاکٛ تٛ مَاکٛ،
ندٜنْ اٛ وَرْتَيْ ٻِطّٛ تٛ اَمْ؞»
6 اَمَّا ندٜ اَللَّه سِرْيِي لِلَ ٻِطّٛ مُوطُمْ اَفٛ ندٜرْ دُونِيَارُ، اٛ وِعِي،
«فُو مَلَاعِکَعٜنْ اَللَّه دٛولٜ مَوْنِنَمٛ؞»
7 دٛوْ مَلَاعِکَعٜنْ بٛو، اٛ وِعِي،
«اَللَّه وَطِي مَلَاعِکَعٜنْ مُوطُمْ نغَرْتَ بٛ حٜنْدُ،
ندٜنْ اٛ وَطِي مَشُّٻٜ مَاکٛ نغَرْتَ بٛ طٜمْطٜ حِيتٜ؞»
8 اَمَّا اٛ وِعِي ٻِطّٛ اٛنْ،
«يَا اَللَّه، لَامُ مَاطَ تَبِتَيْ حَا اَبَدَا اَبَدِنْ؞
اَادِلَاکُ وٛنِ سَوْرُ ندُ لَامٛرْتٛطَا يِمْٻٜ مَاطَ؞
9 اَ يِطِ اَادِلَاکُ، اَ وَݧِي کٛ وٛوطَا؞
کَنْجُمْ وَطِ مِنْ، اَللَّه مَاطَ، شُٻُمَامِ نغَطُمِ کٜٻُطَا مَنْغُ غَدَّيْطُمْ نَنُکِ بٜلْطُمْ ٻُرْطُمْ طُمْ
ٻٜ نغٛنْدُطَا؞»
10 طٛنْمَا اٛ وِعِي،
«اَنْ جٛومِرَاوٛ، دَغَ اَرَنْدٜ اَنْ تَغِ دُونِيَارُ ندُعُ،
اٜ جُوطٜ مَاطَ نغَطِرْطَا دٛوْ؞
11 طُمْ رٜعَيْ، اَمَّا اَنْ اَ تَبٛتٛ؞
طُمْ فُو طُمْ حِيطَيْ بٛ کٛلْتٜ؞
12 اَ تَغَّيْطُمْ بٛ شُدَّارِ،
طُمْ وَيْلِتَيْطُمْ نٛ طُمْ وَيْلِتِرْتَ کٛلْتٜ؞
اَمَّا اَنْ، اَ طٛنْ نٛ نغٛنْتِندِرْطَا،
حَا اَبَدَا دُوٻِ مَاطَ نغَلَا کٜىٰرٛلْ؞»
13 اَللَّه مٜىٰطَايِ وِعُکِ غٛطّٛ مَلَاعِکَاجٛ،
«جٛوطَ تٛ جُنْغٛ ݧَامٛ اَمْ
نَا مِ وَطِي وَݧْوَݧْٻٜ مَاطَ نغَرْتِي
تٛ نجٛوَتَا کٛيْطٜ مَاطَ؞»
14 مَلَاعِکَعٜنْ طُمْ ٻٜيٜ؟ ٻٜ رُوحُوجِ کُوَنٛوجِ اَللَّه ٻٜ اٛ لِلَتَ نغَمْ مبَلَّ کٜٻَيْٻٜ کِسْندَمْ؞