18
Babilonia urman
1 Chay pasaymanta ricorkani waj angelta, janaj pachamanta urakamuchcajta sinchi autoridadniyojta. C'anchayninwan cay pachata c'ancharkan. 2 Alto vozwan wajach'acorkan, nispa:
“¡Urmanña, athun Babilonia llajta urmanña!
Sajra espiritucunapaj tiyananman tucupun,
tucuy clase khelli espiritucunapaj lugarnin,
chejnicoj khelli sajra animalcunapaj tapan.
3 Tucuy nacioncuna adulterio jucha
ruwaskanwan vinowan jina machaycorkancu.
Gobernajcuna chay adulterio juchata ruwaj
warmiwan adulterio juchacunata ruwarkancu.
Negocio ruwajcuna khapajyarkancu sinchi
viciocunapi gastaskancuwan.”
4 Janaj pachamanta uj vozta uyarerkani nejta:
“Cay llajtamanta llojsiychis, nokapaj
runaycuna, mana chay juchapi
ruwaysinayquichispaj, nitaj paywan cusca
castigaska canayquichispaj.
5 Juchancuna janaj pachacama taukacun,
Diostaj paycunapaj mana allin
ruwaskancuta yuyarin.
6 Payman cutichipuychis imaynatachus
kancunaman korkasunquichis jinata,
iscay cutita cutichipuychis
ruwaskanmanta nejtenka.
Chhajruskanmanta nejtenka
iscay cuti fuerteta chhajruychis
castigota tragota jina ujyananpaj.
7 Pay pay tucuspa ima munaskanta ruwarkan,
chaymanta astawan achqhata koychis
ñac'ariyta, wakaspa sufriytawan.
Payka sonkonpi nerkan:
‘Caypi gobernaj reina jina tiyachcani.
Mana viudachu cani, ni sufrisajchu.’
8 Chayraycu uj ch'ulla p'unchaypi payman
jamonka castigocunaka, wañuy, ñac'ariy,
yarekaypiwan.
Ninapi ruphaska canka, imaraycuchus tucuy
atiyniyoj Señor Dios payta castigan.”
9 Paywan adulterio jucha ruwaj, tucuy vicio jucha ruwaj gobernajcuna wakankacu, kaparenkacutaj paypaj ruphaycuskan k'osnita ricuspa. 10 Castigota manchacuspa carumanta khawankacu, nenkacutaj:
“¡Ay, ay, kanmanta athun Babilonia llajta,
atiyniyoj llajta!
Konkay chayamun castigoyqueka.”
11 Negocio ruwajcuna wakallankacutaj, chay llajtamanta kaparenkacu. Rantejcuna manaña cankachu rantinancupaj: 12 korita, kolketa, alaja rumicunata, perlacunata, linomanta sedamanta fino telacunata, morado puca telacunata; tucuy ima sumaj k'apaj tablacunata; marfilmanta, lujo tablacunamanta, broncemanta, fierromanta, marmolmantawan ruwaskacunata; 13 canelata, k'apaj miqhuy jampicunata; inciensota, mirrata, k'apaj perfumecunata; vinota, aceiteta, t'anta jac'uta, trigota; cargana animalcunata, ovejacunata, caballocunata, carrocunata, patronniyoj causachcaj runacunatapas. 14 Chay llajtamanta nenkacu:
“¡Kanpaj munaskayqui sach'acunapaj misq'i
urincuna manaña capusunquichu!
Wiñaypaj chincapun tucuy lujo cayniyqui
khapaj cayniyquipas.”
15 Chay negocio ruwajcuna chay llajtapi llanc'askancuwan khapajyajcuna chay castigota manchacuspa, carumanta khawankacu wakaspa, kaparispataj. 16 Nenkacu:
“¡Ay, ay, athun llajtamanta!
Linomanta fino p'achayoj warmiman
rijch'acorkan, morado puca p'achayoj,
koriwan jallch'aska, perlacunawan,
alaja rumicunawan.
17 ¡Chay tucuy khapaj caynin konkay tucuchacun!”
Barco apajpaj tucuy jefencuna, kochapi barco apajcuna, barcocunapi llanc'ajcuna, tucuy kochapi llanc'aspa ganacojcunapiwan carumanta khawankacu. 18 Llajta ruphaycuska k'osnita ricuspa, wajach'aconkacu: “¿Mayken llajtataj canman cay athun llajta jinari?” 19 Wakaspa, kaparispa, umancuman ñut'u jallp'ata jich'aycucuspa, wajach'aconkacu:
“¡Ay, ay, athun llajtamanta!
Tucuy kochapi caj barcoyojcuna khapaj
cayninwan khapajyarkancu.
¡Cunantaj konkay ñut'uska capun!”
20 Kan, oh janaj pacha, cusicuy chay
llajtamanta, cusicuychis kancuna, Diospi
creejcuna, apostolcuna, profetacunapas.
Dios payta castigaspa,
kancunata uyarerkasunquichis.
21 Uj atiyniyoj ángel okharerkan uj rumita, cutanapaj athun rumita jina. Kochaman chhokaycuspa, nerkan:
“Ajina chhokaycuska canqui, kan athun llajta
Babilonia, jayc'ajpas ricusunquichisñachu.
22 Calleyquicunapi jayc'ajpas uyariconkañachu
arpacunata, kenacunata, cornetacuna
tocaskata.
Ni imapi llanc'ajniyquicunapas cankachu.
Athun cutana rumipaj suenayninpas
uyariconkañachu.
23 Lamparapaj c'anchaynin jayc'ajpas
c'anchankañachu.
Casarajcunapaj fiestancunapi cusicuycunapas
manaña uyariconkachu, negocio
ruwajniyquicuna atiyniyoj carkancu
chaywanpas, laykacuyniyquiwan tucuy
nacioncunata engañarkanqui chaywanpas.”
24 Chay llajtapi riqhurerkan profetacunapaj, Diospi creejcunapaj, cay pachapi tucuy wañuchiska runacunapaj yawarnin.