66
66-küy •••• Ibadetke türtke bolidighan guwahliq
1 Neghmichilerning béshigha tapshurulup, tarliq sazlar bilen oqulsun dep, küy-naxsha: —
Pütkül jahan, xushalliq bilen Xudagha tentene qilinglar!
2 Uning namining ulughluqini naxsha qilip jakarlanglar,
Uning medhiyilirini shereplik qilinglar!
3 Xudagha: «Séning qilghanliring neqeder qorqunchluqtur!
Qudriting zor bolghach,
Düshmenliring aldingda zeipliship teslim bolidu;
4 Barliq yer yüzidikiler Sanga sejde qilip,
Séni küylep, naxsha éytishidu;
Ular namingni küylep naxsha qilip éytidu» — denglar!
Sélah!
5 Kélinglar, Xudaning qilghanlirini körünglar;
Insan baliliri aldida qilghan karametliri qorqunchluqtur.
6 U déngizni quruqluqqa aylandurdi;
Ejdadlirimiz deryadinmu piyade ötti;
Biz u yerde uningdin xursen bolduq. ■ Mis. 14:21-31; Ye. 3:14
7 U qudriti bilen menggü höküm süridu;
Uning közliri ellerni közitip turidu;
Asiyliq qilghuchilar meghrurlanmisun!
8 I qowmlar, Xudayimizgha teshekkür-medhiye éytinglar;
Uninggha bolghan medhiye-hemdusanalarni yangritinglar!
9 U jénimizni hayatliq ichige tikken,
Putlirimizni téyildurushlargha yol qoymaydu.
10 Chünki Sen, i Xuda, bizni siniding;
Kümüshni otta tawlighandek bizni tawliding.
11 Sen bizni torgha chüshürdung;
Bélimizge éghir yükni yükliding.
12 Xeqlerni béshimizgha mindürdüng;
Biz ot we kelkünni bésip öttuq;
Sen axir bizni kengrichilikke chiqarding.
13 Men köydürme qurbanliqlarni élip öyüngge kirey;
Sanga qilghan qesemlirimge emel qilimen;
14 Berheq, béshimgha kün chüshkende lewlirim chiqarghan,
Éghizim éytqan wedilirimni emelge ashurimen.
15 Men Sanga bordaq mallarni köydürme qurbanliq qilip sunimen,
Qochqarlarning yéghini xush puritip köydürimen;
Öküz we öchkilerni ekilip sunimen.
Sélah!
16 Xudadin eymin’güchi hemminglar, kélinglar, qulaq sélinglar!
Uning men üchün qilghan karametlirini bayan qilimen;
17 Aghzim échip uninggha peryad kötürdüm,
Uning ulughluqini jakarlighan medhiyiler tilimda boldi.
18 Könglümde gunahni közlep yürgen bolsam,
Reb duayimni anglimighan bolatti.
19 Biraq Xuda anglidi;
U duayimgha qulaq saldi.
20 Xudagha teshekkür-medhiye yaghdurulsun!
U méning duayimni yandurmidi,
Hem mendin özgermes muhebbitini élip ketmidi!