1 He Nengazen he iyan Egalen dey, is kegkemekeǥeǥehem nu egkaahà kayi te tivuuk he kelibutan!

Egkezineg nu ziyan te langit is kedeliǥa te menge etew kenikew.

2 Minsan is dezeisey pa he menge vatà mibpenurù nu te kedalig kenikew,

su wey mepeel-elezi is menge kuntada nu he ebpeninguhà he mekavales.

3 Emun edtengteng a ziyà te langit he mibeelan nu,

ne egkeehè ku is bulan wey menge vituen he insavuk nu ziyà te nengesevukan dan,

4 ebpekeinsà a ziyà te ǥehinawa ku te hengkey ves is menusiyà, maan is utew nu edseǥipaa?

Menusiyè dà sikandin, piru maan is utew nu igkeseeng?

5 Midhimu nu sikandin he minus pa is gehem din, kenà haazà is menge velinsuǥuen nu,

piru imbeǥey nu kandin is dengeg, in-iring nu sikandin te hadì.

6 Midhimu nu sikandin he iyan edumala te menge linimbag nu;

ne mibpeveyveyaan nu kandin is langun,

7 ragkes en kayi is langun he menge langgam wey menge keranapranap:

sikan is ebpenhipanew,

8 sikan is ebpemenlayang, wey sikan is diyà ebpen-ubpà te wahig.

9 He Nengazen he iyan Egalen dey, is kegkemekeǥeǥehem nu egkaahà kayi te tivuuk he kelibutan!