1 Utew zeyzey is etew he edtevang te menge egkaayuayu.

Su edtevangan sikandan te Nengazen emun timpu te kelised.

2 Egkelesaǥan sikandin te Nengazen wey edtipiǥan is untung din.

Edtuvazan sikandin te Nengazen kayi te tanà he Israel;

kenà sikandin ibeǥey ziyà te menge kuntada zin.

3 Edtevangan sikandin te Nengazen ke egkezeruwan;

ebewian din sikandin te egkeǥezam din.

4 Migkaǥi a te, “Nengazen, kehizuwi a kenikew.

Bewii a, su edtug-an a he nekesalà a ziyà te kenikew.”

5 Mezaat is migkaǥi te menge kuntada ku mehitenged kedì.

Ke sikandan te, “Deyzey ke ebpatey en sikandin su wey melipati en.”

6 Uvag kun edleuyen e zan,

piru ebpen-ehè dan bes te mezaat he egketudtul zan mehitenged kediey.

Ne emun diyè dan en te ǥawas ne ebpenudtulen dan haazà diyà te zuma.

7 Is langun he egkeepes kedì ne ebpenèneesà mehitenged kediey,

ne ed-isip-isip dan te mezaat ke ebmenumenu zan para mezeeti a.

8 Ke sikandan te, “Utew en gerabi is daru zin,

umbe kenè ne sikandin ebpekeenew.”

9 Minsan is emiǥu ku utew he egkeseriǥan ku he mibpekidtuǥen kedì te egkaan ne iyan midluib kedì.

10 Piru sikew, Nengazen, kehizuwi a kenikew;

bewii a kenikew su wey a mekevales te menge kuntada ku.

11 Ne egketuenan ku he nekepenunuat a kenikew,

su kenè nu idtuǥut he mezaag a te menge kuntada ku.

12 Tenged te wazà mezaat he vaal ku, ne idtuǥut nu he mekeubpà a zuma kenikew te wazà pidtemanan.

13 Edeliǥen is Nengazen he Megbevayà te Israel te wazà pidtemanan. Amen! Amen!