1 He Megbevayà, ipeehè nu he wazè ku salà,

ne levani a su wey a kenà mezezeeti te menge etew he kenà edtuu te Megbevayà.

Libriya a te kedezeeti kedì te limbungan wey lalung he menge etew.

2 Iyan ka, Megbevayà melig-en he eputè ku.

Ne maan is inselikwey a kenikew?

Maan is kinahanglan pa he egkeseeng a tenged te kedèdaaǥa kedì te menge kuntada?

3 Teyawi a ne penurua a te tutuu

su para meǥiyahi a te kebpekid-uliey kenikew ziyà te valey nu he ziyà te segradu he vuvungan.

4 Ne zutun ed-uvey a ziyà te pemuhatà he zutun ka ebpemuhata, Megbevayè ku,

iyan ka ebeǥey kedì te kelipey.

Megbevayè ku, edeliǥen ku sikew pinaaǥi te kedtukar te alpa.

5 Maan is egkeseeng a wey egkeǥiyaǥiya?

Ereg a he edsarig kenikew. Uya, ed-umanan ku sikew edeliǥa, is menluluwas wey Megbevayè ku.