1 Sikiyu is langun he keet-etawan diyà te menge nasyun,

pelakpak kew wey ugyab kew te kedalig te Megbevayà he egkezumahan te kelipey.

2 Utew telehuzen is Nengazen he iyan kes Utew Lavew he Megbevayà.

Mekeǥeǥehem sikandin he hadì te tivuuk he kelibutan.

3 Edhimuwen din he iyan key edumala is menge tig-Israel te menge nasyun.

4 Mibpilì din is tanà he egkepengevilin dey, he iyan kes tanà he impehivantug te pinelanggè din he si Jacob.

5 Dutun te kedhendiyà te Megbevayà te pinuuwè din te kedhadì, ed-ugyab is menge etew te kegkelipey zan duma is kebpezaǥing te menge vudyung.

6 Kanta kew te kedalig te Megbevayà.

Kanta kew te kedalig te hadì tew.

7 Su iyan is Megbevayà hadì te tivuuk he kelibutan.

Deliǥa niw sikandin pinaaǥi te menge kanta.

8 Ebpinuu sikandin diyà te segradu he pinuuwè din te kedhadì su edhedian din is menge nasyun.

9 Edtiǥum is menge pengulu te menge nasyun duma is menge etew te Megbevayà ni Abraham.

Su is menge pengulu te kelibutan gaked te Megbevayà.

Mezait iyan sikandin he edeliǥen.