1 Nememinuu key ziyà te veyvey te menge wahig diyà te Babilonia he ebpemenineǥew hein netenuzan dey is Zion.

2 Impenanggat dey zà is menge alpa zey ziyà te menge subpang te kayu.

3 Su ibpekanta key te menge mibihag kenami.

Midsuǥù key zan te kedlangan kandan.

Ke sikandan te, “Kentahi key te kanta he mehitenged te Zion!”

4 Ebmenumenu key te kegkanta te kanta mehitenged te Nengazen diyà te tanà te menge mibihag kenami?

5 Berakat he kenè ku en mewaleng is kewanan he velad ku ke egkelipatan ku is Jerusalem!

6 Berakat he kenà ad mekekaǥi emun kenè ku edtentenuzan wey ed-isipen he iyan ebpekeveǥey kedì te zekelà he kelipey is Jerusalem.

7 Tentenuzi nu, Nengazen, is mibeelan te menge Edomnen hein mid-aǥew te menge tig-Babilonia is Jerusalem.

Migkaǥi zan te, “Purungi niw heeyan bengkaǥa.”

8 Sikiyu is menge meǥinged te Babilonia, edezeetan kew!

Utew zeyzey is menge etew he ebales keniyu tenged te mibeelan niw ziyà te kenami.

9 Utew zeyzey is egkuwa te menge anak niw ne idrumbag dan diyà te vatu.