1 He Nengazen, ebpengumew-umew a kenikew, ne segugunà a tevangi.

Pemineǥa nu heini is kebpengumew-umew ku kenikew.

2 Isipa nu he iring te veyewà heini is ampù ku ziyà te kenikew.

Isipa nu is kebeyawa ku te menge velad ku he iring kemahal te mahapun he kebpemuhat.

3 Giyahi nu, Nengazen, is kebpengaǥikaǥi ku su wey a kenà mekekagi te mezaat.

4 Ilikey a te kebpekevaal te mezaat wey te kedtampu te ebeelan te menge lalung.

Ilikey a te kebpekivahin te ǥastu zan.

5 Mezawat ku is kedawey wey kedsawey kedì te metazeng he etew;

kenè ku haazà mevelivezi su iyan idhimuwa zin dutun is tenged te ǥaǥew zin wey keupiya zin kedì.

Iyan, is menge lalung mulà layun ku id-ampù he kenà medlampus is mezaat he menge vaal zan.

6 Emun ibpenimbag en diyà te pangpang is menge edumala kandan, ebpeketuu zan he tutuu is menge lalag ku.

7 Ne zutun egkaǥi zan te, “Ebpekedsusuwey en bes is menge tulan tew ziyà te edlevengan kenitew ne egkeiring heini te menge vatu he ebpemekeǥawas ke egkeeradu.”

8 Umbe, Nengazen he MEGBEVAYÀ, diyan e zà edsarig;

ed-aput a ziyà te kenikew,

umbe kenè nu ituǥut he egkepatey a.

9 Ilikey a kenikew zuen te menge penuǥes te lalung he menge etew he idhingutel zan kedì.

10 Himuwa nu he iyan sikandan meutel zuen te penuǥes dan, ne mekelikey a mulà dutun.