1 Alatala! N ma Ala ni i ra!

N ni i tantunma nɛn,

n yi i xinla binya.

I bata i ya kabanako feene rakamali,

i naxanye ragidixi i ya tinxinyani

xabu to mi na ra.

2 I bata taan lu

alo gɛmɛ malanxine,

i bata taa makantanxin findi taa xɔnna ra.

Taa mi fa xɔɲɛne taa fangamaan na,

a mi fa tima sɔnɔn.

3 Nanara, yama sɛnbɛmane i binyama nɛn

siya gbalotɔne taane yi gaxu i yɛɛ ra.

4 Luxunden nan i tan na yiigelitɔne xa,

sɛnbɛtarene luxundena

e na bira lanbaranni,

e nun yigiyadena tule gbeen bun,

e nun nininna soge xɔlɛn bun.

Muxu ɲaxine xɔlɔn luxi nɛn

alo tule foye gbeen na dɔxɔ sansanni,

5 alo sogen wuyenna tonbonna ma.

I xɔɲɛne sɔnxɔ xuiin danma,

alo kundaan nininna wuyenni suxuma kii naxan yi,

i gbalotɔne nɔ sɔtɔ sigin danma na kii nin.

6 Alatala Sɛnbɛn Birin Kanna ɲaxaɲaxani tɔnma geyani ito fari,

a lu alo sube turaxi donna

nun manpa faɲi minna,

suben nun manpa fisamantenne yɛtɛna.

7 Geyani ito fari,

a sunu dugin bama nɛn

yamanane muxune birin yɛtagin xun na,

e nun kasangenna naxan siyane birin ma.

8 A sayaan halagima nɛn habadan!

Marigina Alatala yi muxune birin yɛɛgen fitan e yɛtagi.

A yi yagin ba a yamani bɔxɔn yiren birin yi.

Alatala nan na falaxi.

9 Na lɔxɔni, e a falama nɛn,

e naxa, “En ma Ala ni i ra!

En na en xaxili tixi a tan nan na,

a yi en nakisi!

Alatala ni i ra!

En xaxili tixi a tan nan na.

En ɲaxan,

en sɛwa a marakisina fe ra!”

10 Alatala bata a yengi lu geyani ito xɔn!

Anu, Moyaba yamanan bata kala

alo sɛxɛn naxan yibodonxi ɲɛɲɛ yinla ra.

11 Mɛn kaane yiine yitexi

alo muxun naxan a bama igeni.

Koni hali e to kataxi,

Marigina e ragodoma nɛn e wasoni.

12 Moyaba kaane,

Marigina ɛ yamanan makantan yinne rabirama nɛn,

a e rabirama nɛn bɔxɔni,

a yi e findi burunburunna ra.