41
Ala nun suxurene fe
1 Ala naxa,
“Ɛ tan fɔxɔ ige tagi bɔxɔn muxune,
ɛ dundu alogo ɛ xa n xuiin namɛ.
Ɛ tan yamanane muxune,
ɛ wɛkilɛn sɔtɔ,
ɛ maso, ɛ falan ti.
En kitin sa en tagi.
2 Nde muxuna nde rakelixi sogeteden binni,* Yanyina nde, a Kirusi nan ma fe falama be, Perisene mangan naxan Babilɔn kaane nɔ yɛngɛni. Na feen mato Taruxune Firinden 36.22-23 kui.
a yi a xili,
a xa lu tinxinna fɔxɔ ra?
Nde siyane soxi a yii
a mangane xuru a bun,
a silanfanna yi e findi burunburunna ra
a xanla yi e findi se dagin na
foyen naxan xalima!
3 A muxune sagatanma yɛngɛni,
a mɔn yi dangu bɔɲɛ xunbenli kiraan xɔn
a munma yi a sanna ti dɛnaxan yi.
4 Nde feni itoe rakamalixi,
a tan naxan yi mayixɛtɛne maxilima
xabu a fɔlɔni?
N tan Alatala nan a fɔlɔn na,
n mɔn luma nɛn a raɲanni.”
5 Fɔxɔ ige tagi bɔxɔne muxune bata a to,
e gaxu,
bɔxɔn danne muxune xuruxurunma,
e birin bata keli, e fama.
6 Birin a bode malima,
birin a falama a lanfaan xa,
a naxa, “I wɛkilɛ!”
7 Yii rafalan fan xabun sɛnbɛ soma,
naxan wuren malaxunma,
na xabun nawɛkilɛma,
a yi a fala suxuren nafala kiin ma,
a naxa, “A lanxi.”
A yi suxuren gbangban
alogo a nama bira.
Marigin yi Isirayila xunba
8 Koni ɛ tan, Isirayila yixɛtɛne,
n ma walikɛne,
Yaxuba yixɛtɛne,
n naxanye sugandixi,
ɛ tan Iburahima bɔnsɔnna,
n xɔyina,
9 n sa ɛ tan nan fenxi bɔxɔn danne ra,
n sa ɛ tan nan xilixi bɔxɔn tongonne ra,
n na a falaxi ɛ tan nan xa, n naxa,
“N ma walikɛɛn nan ɛ ra,
n bata ɛ sugandi,
n mi n mɛxi ɛ ra.”
10 Nayi, ɛ nama gaxu
amasɔtɔ n na ɛ xɔn.
Ɛ nama kɔntɔfili,
amasɔtɔ ɛ Ala nan n na.
N na ɛ sɛnbɛn gboma ayi nɛn,
n yi ɛ mali,
n yi ti ɛ bun sɛnbɛn nun tinxinni.
11 Naxanye birin yi kelixi ɛ xili ma,
ne yagima nɛn e xun sin!
Naxanye yɛngɛn nakelixi ɛ xili ma,
ne luma nɛn fufafu, e raxɔri.
12 Ɛ ɛ yɛngɛfane fenma nɛn,
koni ɛ mi fa e toma sɔnɔn!
Naxanye yi ɛ yɛngɛma,
ne luma nɛn fuu.
13 Amasɔtɔ n tan nan Alatala ra,
ɛ Ala,
naxan ɛ yiifari ma yiin suxuma,
n yi a fala ɛ xa,
n naxa, “Ɛ nama gaxu,
n tan nan ɛ malima.”
14 Alatalaa falan ni ito ra, a naxa,
“Ɛ tan Yaxuba bɔnsɔnna,
ɛ tan naxanye luxi alo kunla,
ɛ nama gaxu,
ɛ tan Isirayila muxudine,
n tan nan ɛ malima,
n tan Isirayilaa Ala Sariɲanxin naxan ɛ xunbama.
15 A mato, n bata i findi ɲingen xɛɛ ra bɔnbɔ seen na
wure ɲin wuyaxin naxan ma
naxanye nɛnɛ a ra, e ɲɔɛ raminixi.
I geyane wuruma nɛn,
i yi e raxuya ayi,
i yi yire matexine liga
alo se dagina.
16 I e yifema nɛn,
foyen yi siga e ra,
wuluwulu gbeen yi e raxuya ayi.
I tan ɲaxanma nɛn Alatala yi,
i yi i kanba Isirayilaa Ala Sariɲanxini.”
Tonbonna findima ige yiren na
17 Yiigelitɔne nun tɔrɔ muxune igen fenma,
koni sese mi na!
Min xɔnla bata e lɛnna maxara.
Koni n tan,
Alatala, n na e yabima nɛn,
n tan, Isirayilaa Ala,
n mi e rabeɲinɲɛ mumɛ!
18 N baa igen nafama nɛn yire matexi magenle fari,
n yi ige xunne ramini mɛrɛmɛrɛne tagi,
n tonbonne findi darane ra,
bɔxɔ xaren yi findi tigi yiren na.
19 N suman binle nun kasiya binle sima nɛn tonbonni,
e nun miriti binle nun oliwi binle.
Ige mi yiren naxanye yi,
n fɔfɔne nun gbinɲɛne nun xarinne si mɛnne yi e bode xɔn,
20 alogo e xa a to, e yi a kolon,
e yi a rakɔrɔsi,
e birin yi a famu
a Alatala nan feni itoe birin ligaxi,
a Isirayilaa Ala Sariɲanxin nan e rakamalixi.
Suxurene tɔnɔ mi na
21 Alatala naxa,
“Ɛ fa ɛ xun mafala kitini.”
Yaxubaa Mangan naxa,
“Ɛ fa ɛ xɔn ba.”
22 Ɛ suxurene xa fa a fala en xa
naxan fama ligadeni.
Ɛ a fala nxu xa feen naxanye bata liga,
alogo nxu xa nxu miri e ma,
nxu yi e raɲan kiin kolon.
Xanamu, ɛ a yita nxu ra
naxan fama ligadeni.
23 Ɛ waxati famatɔne fe fala nxu xa.
Nayi nxu a kolonma nɛn
a alane nan ɛ ra.
Ɛ fena nde liga,
xa a findi a faɲin na
hanma a ɲaxina,
alogo nxu birin xa na to,
gaxun yi nxu suxu.
24 Koni na yigenla fisa ɛ xa,
ɛ wanle mi sese ra.
Naxan na ɛ sugandi,
muxu haramuxin nan na kanna ra.
25 N bata muxuna nde rakeli sogeteden kɔmɛnna ma,
a fama nɛn sa keli sogeteden binni
naxan n maxandima.
A mangane yibodonma alo borona,
alo fɛɲɛ rafalan fɛɲɛ bɛndɛni bodonma kii naxan yi.
26 Nayi, nde bata yi na feen fala a fɔlɔni,
alogo en xa a kolon?
Nde a fala benun a xa liga,
alogo en xa a fala, en naxa,
“A ɲɔndi”?
Muxu yo mi sese fala,
feni ito mi falaxi benun a xa liga,
muxe mi ɛ fala yo mɛxi.
27 Koni n singe nan a fala Siyon taani,
n naxa, “A mato, e tan ni i ra!”
N bata xɛrana nde fi Yerusalɛn ma,
naxan fama xibaru faɲin na.
28 Anu n mi kawandi muxu yo toxi suxureni itoe yɛ,
n na maxɔdinna ti,
e mi n yabima.
29 A mato sese mi e ra.
E wanle mi sese ra.
E suxurene findixi foyen nun fe fuun nan na.
*41:2: Yanyina nde, a Kirusi nan ma fe falama be, Perisene mangan naxan Babilɔn kaane nɔ yɛngɛni. Na feen mato Taruxune Firinden 36.22-23 kui.