1 Beli suxuren bata a xinbi sin,* Babilɔn kaane gbee alane nan yi Beli nun Nebo ra.

Nebo suxuren yi a felen.

Ɲingene nan e suxurene maxalima.

E yi e dɔxɔma e xun ma nɛn sali waxatine yi,

koni iki e bata findi goronna ra sube xadanxine xun ma.

2 E bata e felen e bode xɔn,

e yi e xinbi sin,

e mi nɔɛ e suxurene rakisɛ

naxanye findixi goronna ra

bayo e tan yɛtɛɛn sigama konyiyani.

3 Yaxuba yixɛtɛne, ɛ tuli mati n na,

ɛ tan Isirayila yamaan muxu dɔnxɛne,

ɛ tan naxanye goron n xun ma

xabu ɛ nga kui,

xabu ɛ xiɲɛn minma!

4 N luma na ki kedenna nin

han ɛ fori waxatini.

N tima nɛn ɛ bun ma

han ɛ xun sɛxɛne yi fixa.

N bata na liga,

n mɔn waxi ɛ xali feni,

n ti ɛ bun, n yi ɛ xɔrɔya.

5 Ɛ n misalixi nde ra?

Nxu nun nde lan?

Ɛ nxu nun nde saxi nxu bode ma,

nxu nun naxan maliga?

6 Muxune e xɛmane fima,

e gbeti fixɛni liga sikeela fari,

e xabun saren fi

alogo a xa ala sawurana nde rafala,

e xinbi sinɲɛ naxan bun ma,

e yi a batu.

7 E a tongo e tungunna ma,

e a maxali,

e sa a dɔxɔ a dɔxɔdeni.

A mi nɔɛ kelɛ a funfuni!

Hali e xui ramini a ma,

a mi e yabima.

A mi e ratangama e kɔntɔfinle ma.

8 Feni ito xa rabira ɛ ma,

ɛ yi ɛ wɛkilɛ!

Ɛ tan muxu murutɛxine,

ɛ miri na ma ɛ bɔɲɛni.

9 Feen naxanye danguxi a fɔlɔ fɔlɔni,

ne xa rabira ɛ ma.

Amasɔtɔ Ala nan n na,

gbɛtɛ mi na!

Ala nan n na,

sese mi maliga n na!

10 Naxan fama ligadeni a raɲanna ra,

n na ralima a fɔlɔn nin.

Naxan munma liga,

n na fe falama xabu waxati xunkuye.

N naxa, n ma fe ragidixin nakamalima nɛn.

N wama naxan birin xɔn,

n yi na liga.

11 N bata sɛnbɛmana nde xili,

sa keli sogeteden binni,

naxan luxi alo singbinna

alogo a xa n ma fe ragidixin nakamali,

sa keli yamana makuyeni.

N naxan falaxi, n yi na rakamali,

n na naxan yitɔn, n yi na liga.

12 Ɛ tuli mati n xuiin na,

ɛ tan muxu bɔɲɛ xɔdɛxɛne,

ɛ tan naxanye makuya tinxinna ra!

13 N ma tinxinyaan somatɔɔn ni i ra!

A mi fa makuya.

N mi fa buma, n kisin nafa.

N kisin nasoma nɛn Siyon taani,

n yi n ma nɔrɔn fi Isirayila ma.