54
Yerusalɛn mi fa rabeɲinxi
1 I tan Yerusalɛn taan naxan luxi alo gbantana,
i xa sɛwa, i tan naxan mi dii barixi!* Yerusalɛn taan yatɛxi gbantan na nɛn bayo a muxune bata yi siga konyiyani yɛngɛn xɔn.
I xa ɲaxan i sɔnxɔ sɛwani,
i tan naxan mi dii sɔtɔn xɔlɛn kolon.
Bayo ɲaxalan nabeɲinxina diine wuyama ayi nɛn
dangu xɛmɛ taa ra dɔxɔn gbeene ra.
Alatala naxa na kiini.
2 I ya bubuni gbo, i yi a fari sa han!
I nama sikɛ,
i ya bubun lutine rakuya ayi,
i yi a sɛnbɛtɛnne xɔn din.
3 Amasɔtɔ ɛ sabatima nɛn yiifanna nun kɔmɛnna ma,
yamanane yi findi ɛ yixɛtɛne gbeen na,
e yi taa yigenle rafe.
4 Ɛ nama gaxu,
amasɔtɔ ɛ mi yagin sɔtɔɛ.
Ɛ nama kɔntɔfili amasɔtɔ ɛ mi rayagima,
koni ɛ ɲinanma nɛn ɛ dii ɲɔrɛyaan yagin xɔn
ɛ mi fa ɛ mirima ɛ kaɲa gilɛyaan yagine ma sɔnɔn.
5 Amasɔtɔ naxan ɛ daxi,
na luxi nɛn alo ɛ xɛmɛn nan na ra.
A xili nɛn Alatala Sɛnbɛn Birin Kanna.
Isirayilaa Ala Sariɲanxin nan ɛ xunbama.
A xili nɛn bɔxɔn birin ma Ala.
6 Amasɔtɔ Alatala mɔn ɛ xilima nɛn
alo ɲaxanla naxan yi rabeɲinxi,
naxan sunuxi!
Muxun mi nɔɛ a foninge waxatin ɲaxanla ramɛ!
Ɛ Ala naxa na kiini.
7 N na ɛ rabeɲin nɛn waxatidi,
koni n mɔn yi ɛ xɔn suxu kininkinin gbeeni.
8 N na n yɛtagin luxun nɛn ɛ ma waxatidi,
n ma xɔlɔ gbeeni.
Koni n kininkininma ɛ ma nɛn
n ma habadan hinanni.
Alatala na nan falaxi naxan ɛ xunbama.
9 Ala naxa, “N na a ligama nɛn to
alo Nuhan waxatini,
n na n kɔlɔ waxatin naxan yi fa fala
fufa gbeen mi fa sama bɔxɔ xɔnna xun ma sɔnɔn.
N mɔn bata n kɔlɔ na kiini,
n mi fa xɔlɔma ɛ xili ma sɔnɔn,
n mi fa n kɔnkɔma ɛ ma sɔnɔn.
10 Hali geyane xuruxurun,
hali yire matexine yimaxa,
n ma hinanna mi a makuyɛ ɛ ra,
n ma bɔɲɛ xunbeli layirin mi kalɛ en tagi.”
Alatala naxa na kiini,
naxan kininkininxi ɛ ma.
Ala mɔn Yerusalɛn tima nɛn
11 Yerusalɛn taa tɔrɔxina,
foye gbeen naxan yimaxaxi,
muxu yo mi naxan madɛndɛnxi!
Awa, n tan, Ala, n mɔn Yerusalɛn taan tima nɛn gɛmɛ tofaɲine ra,
n mɔn yi a bɛtɛn sa gɛmɛ mamiloxi faɲine ra.
12 N taan makantan sangansone findima nɛn gɛmɛ gbeeli faɲine ra,
n yi taan so dɛɛne ti gɛmɛ fixɛ mayilenxine ra
n taan nabilinna yinna ti bɔxɔ bun nafunle ra.
13 Ɛ diine birin findima nɛn Alatalaa xarandiine ra,
e bɔɲɛ xunbenla yi gbo ayi.
14 Ɛ sabatima nɛn tinxinyani.
Ɲaxankatan masigama ɛ ra nɛn.
Ɛ mi fa gaxuma sese yɛɛ ra,
gaxun masigama ɛ ra nɛn,
a mi fa a masoma ɛ ra.
15 Xa muxune ɛ yɛngɛ,
na mi kelixi n tan ma,
naxan yo na ɛ yɛngɛ,
na birama nɛn ɛ sanna bun!
16 A mato, n bata xabun da,
naxan tigen tɛɛn nafema,
naxan yɛngɛ so seen nafalama a kiini.
Koni n tan nan mɔn halagi tiin daxi
naxan a kalama.
17 Yɛngɛ so se yo na rafala ɛ xili ma,
na mi fefe ligɛ ɛ ra.
Naxan yo na ɛ tɔɲɛgɛ kitisadeni,
ɛ yoon sɔtɔma na ma nɛn.
Alatalaa walikɛne na nan sɔtɔma e kɛɛn na,
n bata na kitin sa e xun mayɛngɛn na.
Alatalaa falan nan na ra.