4
Yigi sana Ala yi
1 Dawudaa bɛtina, bɛti baane kuntigin xa. A xa ba maxase luti kanne ra.
2 N ma Ala tinxinxina,
n na i xili, i xa n yabi.
N ma tɔrɔni, i xa n mali.
Kininkinin n ma,
i yi n ma maxandin namɛ.
3 Ɛ tan adamadiine,
ɛ n ma binyen findima yagin na
han waxatin mundun yi?
Ɛ fatama fe fuune nun wulene ma
waxatin mundun yi?
Bɛti xuini te.
4 Ɛ xa a kolon,
a Alatala bata muxu tɔgɔndiyaxine sugandi a yɛtɛ xa.
N na Alatala maxandi,
a n xuiin mɛma nɛn.
5 Ɛ gaxu, ɛ fata yulubi ligan ma.
Ɛ na ɛ sa, ɛ raxara,
ɛ bɔɲɛn namiri.
Bɛti xuini te.
6 Ɛ saraxan ba Ala xa tinxinni.
Ɛ yigin sa Alatala yi.
7 Muxu wuyaxi naxa,
“Nde hɛrin yitɛ en na?
Alatala, i nɔrɔn xa godo nxu ma!”
8 Koni i bata n bɔɲɛn nasɛwa han,
dangu se xaba waxatin lugon sɛwan na.
9 N na n sa,
n xima bɔɲɛ xunbenla nin,
amasɔtɔ i tan Alatala nan tun n makantanma.