6
Ala maxandin tɔrɔ waxatini
1 Dawudaa bɛtina, bɛti baane kuntigin xa. A xa ba maxase luti kanne ra e nun kondenna luti solomasɛxɛ kanna ra.
2 Alatala, i nama n maxadi xɔlɔni!
I nama fitina n xili ma,
i n ɲaxankata!
3 Alatala, kininkinin n ma,
n bata xadan!
Alatala, n nakɛndɛya,
bayo fanga mi fa n na.
4 N niin tɔrɔxi han!
Alatala, han waxatin mundun yi?
5 Alatala, fa n kantan.
N niin nakisi i ya hinanni.
6 Muxe mi e mirɛ i tan ma sayani.
Nde nɔɛ i tantunɲɛ laxira yi?
7 N bata xadan kutundeni,
n ma sadeni kunxi yɛɛgen na kɔɛ yo kɔɛ,
n wugama han n ma xunbunsaan yi yikun.
8 Sunun bata n yɛɛni fɔrɔ.
Wugan bata n yɛɛne buturun n yaxune fe ra.
9 Ɛ makuya n na,
ɛ tan fe ɲaxi rabane!
Bayo Alatala n wuga xuiin mɛma.
10 Alatala bata n ma mayandi xuiin mɛ,
Alatala mɔn bata n ma maxandin suxu.
11 N yaxune birin yagima nɛn,
e yarabi.
E kuisanxin xɛtɛma nɛn mafurɛn!