21
Ala tantunna mangan xɔn
1 Dawudaa bɛtina, bɛti baane kuntigin xa.
2 Alatala, mangan bata sɛwa i fangan na.
A sɛwan gbo bayo i bata a rakisi.
3 A waxi naxan xɔn, i tinxi na ma.
I bata a maxandin yabi.
Bɛti xuini te.
4 I bata a rasɛnɛ duba faɲine ra,
i mɔn yi xɛma mangaya taxamasenna so a xun na.
5 A maxɔdinna ti nɛn a siimayana fe ra,
i yi sii xunkuyen so a yii,
naxan luma habadan.
6 A binyen bata gbo ayi fata i ya marakisin na.
I nɔrɔn nun xunnayerenna fixi nɛn a ma.
7 I a barakama habadan!
I a ralugoma sɛwan na i yɛtagi.
8 Bayo Mangan yigin saxi Alatala nin,
a kantanxi Kore Xɔnna Ala hinanna nan baraka yi.
9 I tan i yaxune birin suxuma nɛn.
Naxanye i raɲaxuxi,
i ne suxuma nɛn i fangan na.
10 I na mini kɛnɛnni waxatin naxan yi,
i e ɲanma nɛn alo sulun tɛɛna.* Sulun tɛɛn mɔn falama yirena nde yi fa fala “Furu tɛɛna.”
Alatala xɔlɔxina e halagima nɛn
tɛɛn yi e gan.
11 I e yixɛtɛne raxɔrima nɛn dunuɲa yi,
e nun e bɔnsɔnne adamadiine yɛ.
12 Hali e fe ɲaxini tɔn i xili ma,
e mɔn yi e miri kɔtɛ ɲaxine ma,
e fulama nɛn.
13 Bayo, i na i ya xalimakunle ti e ra,
e e xun xanbi soma nɛn, e yi e gi.
14 Alatala xa batu a sɛnbɛ gbeena fe ra.
Nxu bɛtin bama nɛn,
nxu yi i tantun i fangana fe ra.