40
1 Mürin, ewe Samol mi Lapalap a aisini Hiop,
2 “Ifa usun, eman mi kütta mwälin Ewe mi Unusen Manaman epwe tongeni apälüa?
Ätewe mi anini ngeni Kot epwe pälüeni.”
3 Mürin, Hiop a pälüeni ewe Samol mi Lapalap,
4 “Nengeni, ngang eman aramas mi aücheangau.
Met üpwe tongeni pälüeni ngonuk?
Üa pineela awei ren pei.
5 Üa kapas fän eu, nge üsap tongeni pälüeni.
Üa kapas fän aruuan, nge üsap chüen kapassefäl.”
Kot a pwärala an manaman
40.6–41.34
6 Mürin, ewe Samol mi Lapalap a pälüeni Hiop seni lon ewe mölümöl o apasa,
7 “Kopwe ütä o tipeni tipen mwän.
Ngang üpwe aisinuk, nge en kopwe pälüeniei.
8 Ifa usun, kopwe amwäliei?
Ifa usun, kopwe atipisiei pwe en kopwe pwüng?
9 Ifa usun, ka pöchökül usun Ngang?
Ifa usun, a osomong osom usun osei?
10 Mürin kopwe foute ngonuk itetekia me iteföüla
o aüföüfa ngonuk ling mi amwarar.
11 Kopwe nenengeni chokewe meinisin mi lamalamtekia,
kopwe ninätiu säsen om song wor o atekisoneretiu.
12 Ewer, kopwe nenengeni chokewe meinisin mi lamalamtekia o atekisoneretiu.
Kopwe purätiu ekewe aramasangau me ewe ia ra ütä ie.
13 Kopwe irerela meinisin lon ewe pwül
o fötekiniir lon ewe lenien sotup.
14 Mürin, ngang won inisi üpwe pwärätä
pwe püsin poum a tongeni amanauok.
15 Kopwe nenengeni ewe man mi fokun watte itan hipopotamus.
Üa föri i usun üa föruk.
I a mongö fetil usun eman ätemwänin kow.
16 Kopwe nenengeni pöchökülen wänükün
me pöchökülen fituken lukan.
17 A tongeni apöchöküla mechan pwe a pöchökül usun efoch irä setar,
nge selin afön ra pachefengen.
18 Chün ra pöchökül usun piras,
nge pechen kana ra usun chök fochun mächä.
19 I akaemanün me lein förien Kot kana mi pöchökül.
Ewe Chon Föri chök a tongeni eniwa.
20 A mär anan won ekewe chuk
ewe ia ekewe manmwacho meinisin ra kukulou ie.
21 A kon lein ekewe irä pwokus iter lotus
o opola lein ekewe wowo lon ewe pwakak.
22 Nürün ekewe irä lotus ra pwölüela,
nge ekewe silifö mi mär aropen ewe öüwö ra nom pwelin ünükün.
23 Are ewe chanpupu a öütöüt, esap niuokus.
A wor an apilüköch,
inamwo ika ewe chanpupu Jortan a pu ngeni mesen awan.
24 Ifa usun, eman epwe tongeni tikilong lon mesan,
ika pwangeni pwötün o särei?