61
Apilükülük ren än Kot tümwün
61.1-8
Ngeni ewe mi emweni chon köl: Won pisekin ettik mi wor saitenin. Echö än Tafit köl.
1 Ai Kot, kopwe rongorong ai siö,
kopwe aüselinga ai iotek.
2 Üa kökköruk seni lesopun fanüfan,
lupwen üa apilükingau.
Kopwe emweniei ngeni ewe achau mi tekia seniei.
3 Pun en ai lenien op,
ka tümwünüöchüei seni ekewe chon oputaei.
4 Kopwe mwüt ngeniei pwe üpwe nom lon imwom mi pin lon unusen manauei,
pwe üpwe kinamwe le op fän poum.
5 Pun en ai Kot, ka rongorong ai kewe pwon,
ka ngeniei wisen chokewe mi meninituk.
6 Kopwe alangatamala ränin manauen ewe king.
Amwo ierin manauan repwe tori ekewe täppin aramas meinisin.
7 Amwo epwe nemenem fän mesom tori feilfeilachök.
Ai Kot, kopwe tümwünü ewe king ren om tong ellet me om allükülük.
8 Mürin üpwe kölün mwareiti itom fansoun meinisin,
lupwen üa apwönüetä ai kewe pwon iteiten rän.