105
An Kot kewe manaman a föri fän iten chon Israel
105.1-45
(1.Kron 16.8-22)
1 Oupwe kilisou ngeni ewe Samol mi Lapalap, oupwe köri itan.
Oupwe asilefeili an kewe föför lein chon ekewe mwü.
2 Oupwe köl ngeni, oupwe kölün mwareiti i,
oupwe apworausa an kewe föför meinisin mi amwarar.
3 Oupwe fokun ingemwareiti itan mi pin.
Chokewe mi kütta ewe Samol mi Lapalap repwe meseik.
4 Oupwe kütta ämi alilis me ren ewe Samol mi Lapalap,
oupwe kütta i fansoun meinisin.
5 Oupwe chechemeni ekewe föför mi amwarar a föriir.
Oupwe chechemeni an kewe manaman me an kewe kapwüng a eäni,
6 ämi mwirimwirin Apraham nöün Kot we chon angang,
ämi mwirimwirin Jakop kewe, ätewe mi fil me ren.
7 Ewe Samol mi Lapalap i ach we Kot,
an kewe allük ra fän iten unusen fanüfan.
8 I a chechemeni an we pwon tori feilfeilachök,
an we kapas a anüküchara ngeni engeröü täppin aramas.
9 A chechemeni ewe pwon a eäni ngeni Apraham,
ewe pwon a eäni fän akapel ngeni Isaak. ✡ Ken 12.7; 17.8; Ken 26.3
10 A anüküchara ewe pwon ngeni Jakop pwe eu allük,
pwal eu pwon esemüch.
11 Iwe, a apasa, “Üpwe ngonuk ewe fanü Kanaan
pwe fanüom.” ✡ Ken 28.13
12 Lupwen nöün Kot kewe aramas ra fokun chokükün,
lupwen ra chon siamü lon ewe fanü Kanaan
13 o saifetal seni eu fanü tori pwal eu fanü,
seni eu mwü tori pwal eu mwü,
14 Kot esap mwüt ngeni eman pwe epwe ariaföüür.
A apwüngü ekewe king pokiter
15 o apasa, “Ousap atapa nei kewe mi fil,
ousap afeiengaua nei kewe soufos.” ✡ Ken 20.7
16 Lupwen ewe Samol mi Lapalap a awarato eu lengita won ewe fanü
o angei seniir ener mongö meinisin, ✡ Ken 41.53-57
17 a tinala eman mwän itan Josef epwe akom mwer,
ätewe ra amömöla pwe epwe eman amanau. ✡ Ken 37.28; 45.5
18 Pechen ra föfö ren selimächä,
nge üan a katolong lon efoch ring seni mächä,
19 tori a fis mine a fen apasa,
nge än ewe Samol mi Lapalap we kapas a alletätä pwe a pwüng. ✡ Ken 39.20–40.23
20 Mürin, ewe kingen Isip a tinala eman pwe epwe amusa Josef,
ewe mi nemeni ekewe mwü a angasala i. ✡ Ken 41.14
21 A seikätä i pwe epwe samol lon imwan
o nemeni mettochun meinisin. ✡ Ken 41.39-41
22 Epwe nemenem won nöün kewe samol
o aiti ngeni nöün kewe souakom tipachem.
23 Mürin, Jakop a feila Isip
o siamü lon ewe fanü. ✡ Ken 46.6; Ken 47.11
24 Nge ewe Samol mi Lapalap a fokun achomonga nöün kewe aramas
o apöchöküleer lap seni chon oputeer.
25 A akulu leluken chon Isip, pwe ra oput nöün kewe aramas
o eäni rawangau ngeni nöün kewe chon angang. ✡ Eks 1.7-14
26 Mürin, Kot a tinala Moses nöün we chon angang
me Aaron ätewe i a filätä. ✡ Eks 3.1–4.17
27 Ir ra föri an kewe asisil me manaman
me lein ekewe aramas me lon ewe fanü Isip.
28 Kot a tinala rochopwak o arochokichi ewe fanü,
nge ekewe chon Isip ra chök ü ngeni an kewe kapas. ✡ Eks 10.21-23
29 Iwe, a awili ngeni cha ar kewe koluk,
pwe ekewe ikenen lor ra mäla. ✡ Eks 7.17-21
30 Fanüer a ur ren kairü,
ra mwo nge tolong lon imwen ar we king. ✡ Eks 8.1-6
31 Kot a kapas, nge ra war chomong pwiin loong,
pwal nikken ra nom lemenen fanüer. ✡ Eks 8.20-24; Eks 8.16-17
32 A apüngätiu wor ütten fau akasiwilin üt,
pwal fifi a fi ekis meinisin won fanüer,
33 Kot a atai ar irän wain me ar irä fiik
o atatakisi irän fanüer meinisin. ✡ Eks 9.22-25
34 Iwe, a kapas, nge ekewe lifichimas ra war,
pwal ekewe kükün lifichimas resap lea.
35 Ra eni meinisin mine a mär me won fanüer
o eni uän fotar irä. ✡ Eks 10.12-15
36 Iwe, a niela ekewe mwänichi meinisin me lon fanüer,
chokewe ra nöüniir lupwen ar pöchökül. ✡ Eks 12.29
37 Mürin, Kot a emwenawu chon Israel
fän silifer me kolt.
Esap wor eman me lein chon ar kewe ainang a apwangapwang.
38 Iwe, chon Isip ra pwapwa, lupwen chon Israel ra towu,
pun ra fokun niuokusitiir. ✡ Eks 12.33-36
39 Kot a anomu eu kuchu wor pwe pwölüpwölür,
pwal eu ekkei, pwe epwe asarameer lepwin. ✡ Eks 13.21-22
40 Ra tüngor, nge i a awarato ekewe machang iter kweil,
a ngeniir mongö mi chomong seni läng. ✡ Eks 16.2-15
41 A asangafeseni ewe achau pwe koluk a puwu seni,
a pulong lon ewe fanüapö usun eu chapupu. ✡ Eks 17.1-7; Num 20.2-13
42 Pun Kot a chechemeni an we pwon mi pin
a eäni ngeni nöün we chon angang Apraham.
43 Iei mine a emwenawu nöün kewe aramas mi fil
fän pwapwa me mweireiren köl.
44 Iwe, a ngeniir fanüen chon ekewe mwü,
nge ir ra fanüeni ewe fanü o feiöchüni än ekewe aramas angang. ✡ Jos 11.16-23
45 Ei a fis pwe nöün kewe aramas repwe aleasochisi an kewe pwüüng
o apwönüetä an kewe allük.
Ousipwe mwareiti ewe Samol mi Lapalap.