1 Azeharomoete.

Pemume'u Tupàn Tuweharupi Wiko Ma'e ikatu haw nehe. Tuweharupi Wiko Ma'e hemiruze'eg wà, pemume'u her ikatu haw nehe.

2 Tuwe teko umume'u Tupàn Tuweharupi Wiko Ma'e her ikatu haw wà nehe,

Ko 'ar rehe wà nehe, tuweharupi wà nehe no.

3 Tuwe teko uzypyrog Tupàn Tuweharupi Wiko Ma'e ikatu haw imume'u pà kwarahy ihem mehe wà nehe.

Tuwe nupytu'u kwaw kwarahy heixe 'ym mehe we wà nehe.

4 Tupàn Tuweharupi Wiko Ma'e weruze'eg teko ywy nànànar wà.

Ikàgaw a'e, ipuràg eteahy haw a'e, ywak i'aromo hin a'e.

5 Naheta kwaw amo Tupàn Tuweharupi Wiko Ma'e Zanezar zàwenugar wà.

Wapyk wenaw rehe ywate a'e.

6 Uzemu'àm ywak rehe har rehe ume'e pà, ywy rehe har hexak pà no.

7 Upyro hemetarer 'ym ma'e maranugar haw wi wà.

Umunyryk kar ma'e hereko 'ymar wama'uhez haw wi wà.

8 Umuigo kar a'e teko tuwihaw wanehe we har romo wà,

Wemiaihu wanuwihaw wanehe we har romo wà.

9 Umuwete kar kuzà imemyr 'ym ma'e hàpuz me har wanupe.

Umurywete kar a'e kuzà a'e, imumemyr kar pà a'e.

Pemume'u Tupàn Tuweharupi Wiko Ma'e ikatu haw nehe.

Azeharomoete.