1 Ame'e ywytyr rehe hepuranu pà.

— Ma'e wi ur putar hepytywà àwàm nehe, a'e hezeupe.

2 Hepytywà àwàm ur putar Tupàn Tuweharupi Wiko Ma'e wi nehe.

Ywak iapo arer romo ywy iapo arer romo hekon a'e.

3 Nanemu'ar kar kwaw a'e nehe.

Nerehe uzekaiw ma'e romo hekon a'e. Tuweharupi ume'e iko.

4 Wiko teko Izaew wanehe uzekaiw ma'e romo a'e.

Nuker pixik kwaw. Ni nuker wewera'i pixik kwaw a'e.

5 Tupàn Tuweharupi Wiko Ma'e uzekaiw putar nerehe nehe.

Tuweharupi neruwake hekon nepyro pà.

6 'Ar romo kwarahy nanemuahy kwaw nehe.

Pyhaw zahy nanemuahy kwaw nehe no.

7 Tupàn Tuweharupi Wiko Ma'e uzekaiw putar nerehe ikatu 'ym ma'e wi paw nepyro pà a'e nehe.

Omonokatu putar nereko haw ikatu 'ymaw wi nehe.

8 Neho mehe uzekaiw putar nerehe nehe.

Nezewyr mehe uzekaiw putar nerehe nehe no, ko 'ar rehe nehe, tuweharupi nehe no.