70
સહાય માટે પ્રાર્થના
ગી.શા. 40:13-17
મુખ્ય ગવૈયાને માટે. સંભારણને અર્થે. દાઉદનું ગીત.
1 હે ઈશ્વર, મારો બચાવ કરો!
હે યહોવાહ, ઉતાવળ કરીને મને સહાય કરો.
2 જેઓ મારો પ્રાણ લેવા ઇચ્છે છે,
તેઓ નિરાશ થાઓ અને આકુળવ્યાકુળ થઈ જાઓ;
જેઓ મારું અનિષ્ટ ઇચ્છે છે,
તેઓ પાછા પડો અને અપમાનિત થાઓ.
3 જેઓ કહે છે કે, “આહા, આહા,”
તેઓ પોતાના અપમાનને કારણે પાછા હઠો.
4 તમારા શોધાનારાઓ હરખાઓ અને તમારામાં આનંદ કરો;
જેઓ તમારા દ્વારા મળતા ઉદ્ધાર પર પ્રેમ કરે છે તેઓ પોકારીને કહો કે,
“ઈશ્વર મોટા મનાઓ.”
5 પણ હું તો દીન તથા દરિદ્રી છું;
હે ઈશ્વર, મારી પાસે ઉતાવળથી આવો;
તમે મારા સહાયકારી તથા મને છોડાવનાર છો.
હે યહોવાહ, વિલંબ ન કરો.